تفصیلات کے مطابق ممبر قومی اسمبلی اجلاس کے دوران شیر افضل مروت آج اپوزیشن گیٹ سے ایوان میں داخل ہونے کی بجائے حکومتی گیٹ سے داخل ہوئے، جبکہ ان کی اسمبلی آمد پر حکومتی اراکین کی جانب سے ڈیسک بجائے گئے جس پر اسپیکر قومی اسمبلی نے کہا کہ  آپ لوگ انہیں مروا نہ دینا۔

قومی اسمبلی میں وقفہ سوالات کے دوران اسپیکر قومی اسمبلی نے موبائل کمپنیوں کے ضم ہونے پر ضمنی سوال کرنے کا کہا تو شیر افضل مروت نے کہا کہ میرا سوال تو ابھی صرف اپنے لوگوں سے یہی ہے کہ مجھے کیوں نکالا ہے۔

دوسری جانب شیر افضل مروت کے مختصر نکتہ اعتراض پر حکومتی ارکان نے قہقہے لگانے شروع کر دیے، مگر پاکستان تحریک انصاف (پی ٹی آئی) اراکین خاموش رہے۔

واضح رہے کہ اس موقع پر حکومتی اراکین نے بھی شیر افضل مروت کا ساتھ دیتے ہوئے کہا مروت کو کیوں نکالا؟ حکومتی اراکین کی جانب سے ظالموں جواب دو، مروت کو حساب دو کے   نعرے لگائے گئے،جبکہ حکومتی اراکین نے بیرسٹرگوہر کو دیکھ کر کہا کہ آپ بھی میرا ساتھ دیں۔

اسمبلی کی کارروائی کے دوران مسلم لیگ (ن)کے رہنما حنیف عباسی نے ہلکے پھلکے انداز میں شیر افضل مروت سے کہا کہ ہم آپ کے ساتھ ہیں،پاکستان تحریک انصاف (پی ٹی آئی) میں واپس بھجوائیں گے۔