وزارت قانون و انصاف کی جانب سے نوٹیفکیشن جاری کر دیا گیا۔ جسٹس سردار سرفراز ڈوگر اسلام آباد ہائیکورٹ، جسٹس اعجاز سواتی بلوچستان ہائیکورٹ، جسٹس جنید غفار سندھ ہائیکورٹ اور جسٹس ایس ایم عتیق شاہ پشاور ہائیکورٹ کے قائم مقام چیف جسٹس مقرر کئے گئے ہیں۔

یاد رہے کہ یکم فروری کو لاہور، سندھ اور بلوچستان ہائی کورٹ سے ایک، ایک جج کا تبادلہ اسلام آباد ہائی کورٹ میں کر دیا گیا تھا۔ جسٹس سردار محمد سرفراز ڈوگر کا لاہور ہائی کورٹ، جسٹس خادم حسین سومرو کا سندھ ہائی کورٹ اور جسٹس محمد آصف کا تبادلہ بلوچستان ہائی کورٹ سے اسلام آباد ہائی کورٹ میں کیا گیا تھا۔

واضح رہے کہ لاہور ہائیکورٹ کی ویب سائٹ کے مطابق جسٹس سردار محمد سرفراز ڈوگر لاہور ہائیکورٹ کے 15 ویں سینئر جج تھے، جن کی تقرری 8 جون 2015 کو کی گئی تھی جبکہ وہ 62 سال کی عمر میں وہ 2 جولائی 2030 کو ریٹائر ہوں گے۔

تبادلے کے بعد جسٹس محسن اختر کیانی کی جگہ جسٹس سرفراز ڈوگر کو سینئر پیونی جج تعینات کرتے ہوئے بینچ نمبر 2 کا سربراہ مقرر کیا گیا تھا۔

اسلام آباد ہائی کورٹ کے 5 ججوں نے اس پر اعتراض کرتے ہوئے درخواست دائر کی تھی، جس میں موقف اختیار کیا گیا تھا کہ آئین کے تحت ہائی کورٹ کے جج کو کسی دوسری ہائی کورٹ میں تبادلے کے بعد نیا حلف اٹھانا چاہیے، جس سے ان کی سنیارٹی رینکنگ متاثر ہونی چاہیے۔ جس پر چیف جسٹس اسلام آباد ہائی کورٹ نے فیصلہ دیا تھا کہ ججز کے تبادلے سے رینک تبدیل نہیں ہوتا۔