آزاد کشمیر ہائیکورٹ کی طرف سے نااہل قرار دیے جانے والے سابق وزیر اعظم آزاد کشمیر سردار تنویر الیاس نے توہین عدالت کیس میں سپریم کورٹ سے معافی مانگ لی جس کے بعد ان کے خلاف توہین عدالت کی کارروائی ختم کر دی گئی۔

سردار تنویر الیاس ایک ماہ بعد انتخاب میں حصہ لینے کیلئے اہل قرار دے دیئے گئے۔ اپریل 2023 میں آزاد کشمیر ہائی کورٹ نے سردار تنویر الیاس کو توہین عدالت کا مرتکب قرار دیکر دو سال کیلئے نا اہل کر دیا تھا۔ عدالتی فیصلے کی بنیاد پر تنویر الیاس کو وزارت عظمیٰ سے الگ ہونا پڑا تھا۔

سردار تنویر الیاس نے ہائی کورٹ کے فیصلے کے خلاف سپریم میں اپیل دائر کر رکھی تھی۔ سپریم کورٹ کی جانب سے دیئے گئے توہین عدالت کے نوٹس پر سردار تنویر الیاس نے عدالت سے معافی مانگ لی تھی۔ ججز کے خلاف تقریر کی بنیاد پر سردار تنویر الیاس کو سپریم کورٹ اور ہائی کورٹ نے ایک وقت میں توہین عدالت کے نوٹس جاری کئے تھے۔

سپریم کورٹ نے سردار تنویر الیاس کے خلاف آزاد کشمیر ہائی کورٹ سے نا اہلی کے خلاف اپیل بھی نمٹا دی۔