تفصیلات کے مطابق ترجمان سندھ حکومت نادر گبول نے نجی نیوز چینل سے بات چیت کرتے ہوئے کہا کہ پارٹی چیئرمین بلاول بھٹو کی جانب سے وفاقی حکومت کو واضح کر دیا گیا ہے کہ اگر دریائے سندھ سے کینال نکالی گئ تو وفاقی حکومت سے الگ ہو جائیں گے۔

ترجمان سندھ کا کہنا تھا کہ وزیر اعظم شہباز شریف کیخلاف عدمِ اعتماد کی تحریک پیش کی جائے گی، پھر یہ حکومت نہیں رہے گی،پاکستان تحریک انصاف (پی ٹی آئی) کی حکومت کو بھی ہماری پارٹی ہی نے گرایا تھا۔

نادر گبول نے کہا کہ سندھ کا کوئی بھی فرد دریائے سندھ سے کینال نکالنے کو کسی بھی صورت میں قبول نہیں کرے گا، سندھ کے پانی پر ڈاکا ڈالنے کی اجازت کسی بھی صورت میں نہیں دی جائے گی۔

گفتگو کرتے ہوئے رہنما پی پی پی کا کہنا تھا کہ پیپلز بس سروس کے کرایوں میں اضافہ ناگزیر تھا، تاہم اس میں صحافیوں اور طلبہ کیلیے مفت سفر کا فیصلہ کیا جائے گا۔

انہوں نے کہا کہ ایم کیو ایم کی سیاست ختم ہوچکی ہے، بوری بند لاشیں اور قتل و غارت ایم کیو ایم کا پیشہ تھا، ایم کیو ایم والے خود کو میڈیا میں زندہ کرنے کیلیے ہم پر تنقید کرتے رہتے ہیں۔