بجلی کی قیمت میں اضافہ
August, 8 2024
اسلام آباد:(سنو نیوز) مہنگائی سے پریشان عوام کو ایک اور مشکل کا سامنا کرنا پڑا ہے کیونکہ حکومت نے بجلی کی قیمت میں اضافہ کر دیا ہے۔
نیپرا (نیشنل الیکٹرک پاور ریگولیٹری اتھارٹی) نے بجلی کے نرخ میں 2 روپے 56 پیسے فی یونٹ اضافے کا نوٹیفکیشن جاری کر دیا ہے۔
یہ اضافہ جون 2024 ءکے فیول ایڈجسٹمنٹ چارجز کی مد میں کیا گیا ہے، جس کے تحت اگست کے بلوں میں صارفین کو اضافی ادائیگیاں کرنا ہوں گی۔
تاہم، اس اضافے کا اطلاق لائف لائن صارفین اور کے الیکٹرک کے صارفین پر نہیں ہوگا۔
نیپرا کے جاری کردہ نوٹیفکیشن کے مطابق، یہ اضافہ جون میں بجلی پیدا کرنے کے لیے استعمال ہونے والے فیول کی قیمت میں اضافے کے باعث کیا گیا ہے۔
سی پی پی اے (سنٹرل پاور پرچیزنگ ایجنسی) نے 2 روپے 63 پیسے فی یونٹ اضافے کی درخواست کی تھی، جس کے بعد نیپرا نے 2 روپے 56 پیسے فی یونٹ اضافے کی منظوری دی۔
اس فیصلے سے پہلے ہی مہنگائی کی چکی میں پسنے والے عوام کو مزید مالی دباؤ کا سامنا کرنا پڑے گا۔
بجلی کے نرخوں میں اضافے سے ملک کے مختلف طبقوں میں مایوسی کی لہر دوڑ گئی ہے، جو پہلے ہی بڑھتی ہوئی قیمتوں، اشیائے خورونوش اور دیگر ضروریات زندگی کے لیے زیادہ ادائیگیوں کا سامنا کر رہے ہیں۔
بجلی کے نرخوں میں اضافے کا یہ فیصلہ ایسے وقت میں آیا ہے جب ملک میں اقتصادی مشکلات عروج پر ہیں، اور عوام کی قوتِ خرید پہلے ہی کمزور ہو چکی ہے۔
ماہرین کے مطابق، اس اضافے سے نا صرف گھریلو صارفین بلکہ کاروباری طبقے پر بھی منفی اثرات مرتب ہوں گے، جس سے مجموعی اقتصادی صورتحال پر دباؤ بڑھ سکتا ہے۔
عوام کی جانب سے اس فیصلے پر شدید ردعمل کا اظہار کیا جا رہا ہے، اور مطالبہ کیا جا رہا ہے کہ حکومت اس فیصلے پر نظرثانی کرے تاکہ مہنگائی کے بوجھ تلے دبے ہوئے عوام کو کچھ ریلیف مل سکے۔
