تفصیلات کے مطابق محکمہ موسمیات نے شمال مغربی بلوچستان، بالائی خیبر پختونخوا اورجی بی میں بارش اور پہا ڑوں پر برفباری کی پیش گوئی کی ہے،ملک کے دیگر علاقوں میں موسم سرد اور خشک رہنے کا امکان بھی ہے۔
محکمہ موسمیات کا کہنا ہے کہ رات کے اوقات میں پنجاب کے بیشتر اضلاع اور بالائی سندھ میں ہلکی سے دھند چھائے رہنے کا بھی امکان ہے۔
محکمہ موسمیات نے شہریوں کو خبردار کرتے ہوئے کہا ہے کہ کوئٹہ، زیارت، ناران، کاغان، چترال، دیر، چمن، پشین، قلعہ عبداللہ، قلعہ سیف اللہ، سوات، کوہستان، شانگلہ اورگلگت بلتستان میں برفباری کے باعث سڑکوں کے بند ہونے اور پھسلن کی وجہ سے ٹریفک کی روانی متاثر ہونے کا خطرہ بھی موجود ہے۔
اسی طرح اسلام آباد اور گرد و نواح میں موسم سرد اور مطلع جزوی ابر آلود رہنے کی امید ظاہر کی جارہی ہے،کے پی کے بیشتر اضلاع میں موسم سرد اور مطلع جزوی ابر آلود رہنے کے علاوہ چترال، دیر، بونیر، باجوڑ، مہمند، خیبر، سوات، شانگلہ، کوہستان، مانسہرہ، ایبٹ آباد، اورکزئی، کرم اور وزیرستان میں تیز ہواؤں کے ساتھ ہلکی بارش اور ہلکی برفباری کا امکان ظاہر بھی ظاہر کیا جارہا ہے۔
محکمہ موسمیات کی جانب سے جاری کردہ رپورٹس کے مطابق بلوچستان کے بیشتر اضلاع میں موسم سرد اور مطلع جزوی ابر آلود رہے گا،جبکہ کوئٹہ، زیارت، قلعہ سیف اللہ چمن، پشین، قلعہ عبداللہ اور چاغی میں تیز ہواؤں کے ساتھ ہلکی بارش اور ہلکی برفباری کی پیشگوئی کی گئی ہے۔
پنجاب کے بیشتر اضلاع میں موسم سرد جبکہ بالائی اضلا ع میں مطلع ابر آلود رہے گا۔
مزید برآں لاہور، شیخوپورہ، قصور، ا وکاڑہ، ساہیوال، بہاولنگر، بہاولپور، پاکپتن، خانیوال، وہاڑی، سیالکوٹ، نارووال، گوجرانوالہ، منڈی بہاؤالدین، رحیم یار خان، خان پور، فیصل آباد، ٹوبہ ٹیک سنگھ، جھنگ اور گرد و نواح میں ہلکی سے درمیانی دھند چھائے رہنے کی توقع ہے۔
