محکمہ موسمیات کا کہنا ہے کہ مغرب سے آنے والا بادلوں کا سسٹم 20 جنوری تک ملک میں موجود رہے گا،جس سے سردی کی شدت میں مزید اضافہ ہو گا۔

محکمہ موسمیات کے مطابق پنجاب کے بیشتر اضلاع میں سورج اور بادلوں کے درمیان آنکھ مچولی کا سلسلہ جاری رہے گا۔ تاہم بادلوں کے اس سسٹم کے داخل ہونے سے راولپنڈی ڈویژن کے مختلف اضلاع میں ہلکی بارش کی توقع بھی ہے۔

محکمہ موسمیات کی جانب سے جاری کردہ رپورٹس کے مطابق لاہور میں بھی بادل رہیں گے،مگر بارش کے امکانات کم ہیں۔ آج صوبائی دارالحکومت میں کم سے کم درجہ حرارت 6 ڈگری سینٹی گریڈ ریکارڈ کیا گیا ہے، جبکہ زیادہ سے زیادہ درجہ حرارت 17 ڈگری تک جانے کے امکانات ہیں۔

دوسری جانب کے پی کے بالائی اضلاع میں 18 جنوری سے گرج چمک کے ساتھ بارش اور پہاڑوں پر شدید برفباری کا امکان ظاہر کیا گیا ہے۔ یہ سلسلہ 21 جنوری تک جاری رہنے کی پیشگوئی کی گئی ہے۔

پی ڈی ایم اے کے مطابق چترال، دیر، سوات، کوہستان، شانگلہ، بٹگرام، مانسہرہ، ایبٹ آباد، ہری پور، مالاکنڈ، بونیر، باجوڑ، مہمند، خیبر، اورکزئی، کرم، وزیرستان، پشاور، چارسدہ، نوشہرہ، صوابی، بنوں، کرک اور کوہاٹ سمیت مختلف اضلاع میں وقفے وقفے سے بارش اور برفباری متوقع ہے۔

محکمہ موسمیات نے شہریوں ک و سرد موسم اور برفباری سے بچاؤ کیلئے احتیاطی تدابیر اختیار کرنے کی ہدایت کی ہے۔