ممتاز نظم نگار، ادیب اور براڈ کاسٹر فہیم جوزی کے انتقال پر اکادمی ادبیاتِ پاکستان کی صدر نشیں ڈاکٹر نجیبہ عارف اور ناظمِ اعلی سلطان ناصر نے گہرے رنج وغم کا اظہار کیا۔

فہیم جوزی کا اصل نام محمد اقبال تھا۔ آپ اپنے قلمی نام "فہیم جوزی" یا "اقبال فہیم جوزی" سے اردو کی ادبی دنیا کی ایک جانی پہچانی شخصیت تھے۔

پنجاب یونیورسٹی سے ایم اے کرنے کے بعد آپ 10 سال تک ریڈیو پاکستان سے منسلک رہے اور اس کے بعد علامہ اقبال اوپن یونیورسٹی سے وابستہ ہوئے، آپ ممتاز نظم گو شاعر تھے۔ آپ کا نظمیہ مجموعہ میں کوئی اور بہت اہمیت کا حامل ہے، آپ کی اہم نظموں میں آنسو، تین رنگ ایک رنگ، ہجر کا وصال اور ریٹائرمنٹ کا آخری دن شامل ہیں۔