وفاقی وزیر دفاع خواجہ آصف نے سیالکوٹ میں میڈیا سے گفتگو کرتے ہوئے کہا کہ معیشت کے تمام اشاریے بہتری کی طرف جا رہے ہیں، کوششیں جاری ہیں کسی طرح سیاسی استحکام پیدا ہوسکے، ملکی معیشت کو بہتر کرنے کیلئے اقدامات کر رہے ہیں۔

خواجہ آصف کا کہنا تھا کہ پی ٹی آئی کا ہر حربہ ناکام ہوا، جس نے بھی عمران خان کو مشورہ دیا اس کی سمجھ میں بہت کمی ہے، کبھی کہتے ہیں آفر ہے بنی گالہ شفٹ ہو جاؤ کبھی کہیں، یہ ان کے خیالات ہیں، تحریک انصاف کے رہنماؤں کی کسی بات میں کوئی صداقت نہیں۔

انہوں نے کہا کہ پی ٹی آئی کی تخریبی سیاست کے باوجود یہ بہت بڑی تبدیلی ہے، سیاسی امن ہو جائے، دہشت گردی ختم ہوجائے تو خود کفیل ہوجائیں گے، پی آئی اے کی پرواز کل پیرس کیلئے روانہ ہوئی، ترسیلات زر میں اضافہ ہوا ہے، اوورسیز پاکستانی ماہانہ اپنے گھروں میں پیسے بھیجتے ہیں۔