جسٹس امین الدین خان کی سربراہی میں سات رکنی آئینی بنچ نے سویلینز کا فوجی عدالتوں میں ٹرائل کالعدم قرار دینے کے فیصلے کیخلاف کیس کی سماعت کی۔
وزارت دفاع کے وکیل خواجہ حارث نے موقف اپنایا کہ سویلینز کا ملٹری ٹرائل کالعدم قرار دیتے وقت آرٹیکل 233 کی غلط تشریح ہوئی، پانچ رکنی لارجر بنچ نے بنیادی حقوق معطل ہونے کا تاثر لیا، بنیادی حقوق ایمرجنسی کی صورت میں معطل ہوئے تھے۔
جسٹس محمد علی مظہر نے کہا کہ اس کیس میں تو بنیادی حقوق معطل ہونے کا کوئی تعلق نہیں، پرویز مشرف کے دور میں اپیل کا حق نہ دے کر حقوق معطل ہوئے تھے۔ جسٹس امین الدین خان نے ریمارکس دیئے کہ اس معاملے میں ایمرجنسی والی تو کوئی بات نہیں ؟۔
جسٹس محمد علی مظہر نے وکیل خواجہ حارث کو مخاطب کرتے ہوئے کہا کہ بنیادی حقوق معطل کرنے کیلئے ایمرجنسی ہونا ضروری ہے، یہ معاملہ مختلف ہے کہ سویلینز کا ٹرائل ہو سکتا ہے یا نہیں۔
وزارت دفاع کے وکیل خواجہ حارث نے عدالت کو بتایا کہ آرٹیکل 233کا فوجی عدالتوں کے کیس سے کوئی تعلق نہیں تھا، آرٹیکل 233 کو آرٹیکل 8 (5) کی تشریح درست ثابت کرنے کیلئے چھیڑا گیا۔
جسٹس محمد علی مظہر نے کہا کہ سپریم کورٹ کے فیصلے موجود ہیں کہ عدالت اپنا اختیار استعمال کروا سکتی ہے۔ جسٹس امین الدین نے ریمارکس دیئے کہ بنیادی حقوق کا عدالتوں میں دفاع ہوسکتا ہے صرف عملدرآمد معطل ہوتا ہے۔ جسٹس مسرت ہلالی نے کہا کہ موجودہ کیس میں ملزمان کو فوجی تحویل میں لیا گیا تو بنیادی حقوق معطل نہیں تھے نہ ہی ایمرجنسی تھی۔
وکیل خواجہ حارث نے موقف اپنایا کہ سپریم کورٹ کے فیصلے میں کہا گیا ہے کہ عملدرآمد روکنا بنیادی حقوق معطل کرنے کے برابر ہے۔ جسٹس محمد علی مظہر نے کہا کہ آرٹیکل 233 کی شق 2 میں تو بنیادی حقوق معطل ہونے کی بات نہیں ہو رہی۔
جسٹس جمال مندوخیل نے ریمارکس دیئے کہ آرٹیکل 233 میں یہ نہیں کہا گیا کہ بنیادی حقوق معطل ہو سکتے ہیں، صدر آرڈر کر سکتا ہے جس سے بنیادی حقوق معطل ہوتے ہیں۔
