انھوں نے اس عزم کا اظہار کیا کہ معیشت کی ترقی کے لیے وہ تمام اسٹیک ہولڈرز کے ساتھ مل کر کام کرنے کو تیار ہیں۔

 

 

کراچی میں پاکستان اسٹاک ایکسچینج کی تقریب سے خطاب کرتے ہوئے وزیراعظم نے کہا کہ انہیں اس بات کی خوشی ہے کہ اسٹاک ایکسچینج کا دورہ کیا، جس نے گزشتہ برسوں میں قابل قدر کامیابیاں حاصل کی ہیں۔ وزیراعظم نے اس بات کو اجاگر کیا کہ پاکستان میں قدرتی وسائل اور محنت کی طاقت کو مربوط کر کے ملک کو ترقی کی راہ پر گامزن کیا جا سکتا ہے۔

 

 

وزیراعظم نے کہا کہ کراچی پاکستان کی معیشت کی ریڑھ کی ہڈی کی مانند ہے اور اس کی ترقی کے لیے نجی شعبے کا کردار انتہائی اہم ہے۔ انہوں نے کہا کہ اس وقت ملک میں معاشی استحکام کی موجودہ صورتحال کو مزید ترقی کی راہ پر گامزن کرنے کے لیے تمام شعبوں کو مل کر کام کرنا ہوگا۔

 

 

وزیراعظم نے واضح کیا کہ حکومت آئی ایم ایف کے ساتھ کیے گئے معاہدے کی مکمل پاسداری کرے گی تاکہ معاشی استحکام کو پائیدار بنایا جا سکے۔ انھوں نے کہا کہ پاکستان کی معیشت جلد ایک نئے دور میں داخل ہو گی، اور ایک وقت آئے گا جب پاکستان آئی ایم ایف کو الوداع کہے گا۔ اس کے ساتھ ہی وزیر اعظم نے آئندہ چھ ماہ میں ٹیکس ہدف کو پورا کرنے کا عہد کیا۔

 

 

وزیراعظم نے کہا کہ اس وقت شرح سود 13 فیصد پر ہے اور اس میں مزید کمی کے امکانات موجود ہیں۔ ان کا کہنا تھا کہ وہ چاہتے ہیں کہ شرح سود 6 فیصد تک آجائے تاکہ ملک پر قرضوں کا بوجھ کم ہو سکے اور عوام کی زندگی میں آسانی آ سکے۔

 

 

شہباز شریف نے اس بات پر زور دیا کہ معیشت کی بہتری کے لیے تجربہ کار معاشی ماہرین کی مشاورت ضروری ہے۔ ان کا کہنا تھا کہ لاہور، کراچی، پشاور اور کوئٹہ کے ماہرین حکومت کو اپنی قابل عمل سفارشات فراہم کریں تاکہ ملک کو معاشی بحران سے نکالا جا سکے اور معاشی ترقی کی طرف گامزن کیا جا سکے۔

 

 

نائب وزیراعظم اور وزیر خارجہ اسحاق ڈار نے کہا کہ پاکستان کی سفارتی تنہائی اب ختم ہو چکی ہے اور ملک نے عالمی سطح پر اپنی حیثیت دوبارہ بحال کر لی ہے۔ انہوں نے کہا کہ وزیراعظم شہباز شریف کی قیادت میں پاکستان دیوالیہ ہونے سے بچا اور جلد ملک کی معیشت مزید مستحکم ہو جائے گی۔ اسحاق ڈار نے اسٹاک مارکیٹ کے تاجروں کو مخاطب کرتے ہوئے کہا کہ مایوسی کی کوئی بات نہیں ہے اور انہیں اپنی پوزیشن مضبوط رکھنے کی ضرورت ہے۔

 

 

وزیر خزانہ محمد اورنگزیب نے کہا کہ پاکستان اسٹاک ایکسچینج کی ترقی ملکی معیشت میں سرمایہ کاروں کے اعتماد کا مظہر ہے۔ ان کا کہنا تھا کہ آئی ایم ایف معاہدے کی وجہ سے معیشت میں استحکام آیا ہے اور اس کے مثبت اثرات ملک کی معاشی پالیسیوں میں نظر آنا شروع ہو گئے ہیں۔ انہوں نے مزید کہا کہ حکومت ایف بی آر میں ڈیجیٹلائزیشن کی سمت میں بھی اقدامات کر رہی ہے اور خسارے میں چلنے والے سرکاری اداروں میں اصلاحات پر کام جاری ہے۔

 

 

وزیر خزانہ نے کہا کہ معیشت کو مزید آگے بڑھانے کے لیے توانائی کے شعبے میں اصلاحات انتہائی ضروری ہیں۔ انھوں نے بتایا کہ حکومت اسٹاک مارکیٹ کے کردار کو بڑھانے کے لیے بنیادی ڈھانچے کی اصلاحات متعارف کرانے کے لیے اقدامات کر رہی ہے۔ اس کے علاوہ، قرضوں کے بوجھ کو کم کرنے کے لیے پالیسی ریٹ میں کمی کی جا رہی ہے اور وفاقی اخراجات میں کمی کے لیے بھی اقدامات کیے جا رہے ہیں۔

 

 

وزیر خزانہ نے کہا کہ پاکستان کی معیشت درست سمت میں جا رہی ہے لیکن یہ سفر طویل ہے۔ اس کے باوجود حکومت نے تمام شعبوں میں اصلاحات کے عمل کو جاری رکھا ہے اور ملکی معیشت کی پائیداری کے لیے قدم بہ قدم کام کر رہی ہے۔