پاکستان کے دفاعی نظام میں اہم پیشرفت

پاکستان کے دفاعی نظام میں اہم پیشرفت

January, 2 2025

اسلام آباد: (ویب ڈیسک) پاکستان نے اپنی فضائی صلاحیتوں میں اضافہ کرنے کے لیے چین سے جدید ففتھ جنریشن لڑاکا طیارے جے۔35 حاصل کرنے کا فیصلہ کیا ہے۔

یہ اقدام پاکستان کو دفاعی طور پر ایک نئی سطح پر لے جائے گا اور دنیا کے چند منتخب ممالک کی صف میں شامل کر دے گا۔

جدید ترین ففتھ جنریشن طیاروں کی خصوصیات:

ففتھ جنریشن طیارے جدید ترین ٹیکنالوجی سے لیس ہیں، جن میں اسٹلتھ ٹیکنالوجی شامل ہے جو طیارے کو ریڈار سے اوجھل رکھنے کی صلاحیت دیتی ہے۔ یہ طیارے اپنی برق رفتاری، جنگی صلاحیت، اور جدید ہتھیاروں کے نظام کی وجہ سے نمایاں ہیں۔

پاکستان کے لیے جے۔35 کا پہلا اسکواڈرن:

بین الاقوامی رپورٹس کے مطابق، چین پاکستان کو جے۔35 طیاروں کا پہلا اسکواڈرن فراہم کرے گا جو 40 طیاروں پر مشتمل ہوگا۔ یہ اسکواڈرن اگلے دو سالوں میں پاک فضائیہ کا حصہ بننے کی توقع ہے۔

بھارت پر دفاعی برتری:

جے۔35 طیارے پاکستان کو بھارت پر فضائی برتری فراہم کریں گے، کیونکہ بھارت کے پاس اس وقت ففتھ جنریشن طیارے موجود نہیں ہیں۔ اگرچہ بھارت اپنے طور پر ففتھ جنریشن طیارے تیار کرنے کی کوشش کر رہا ہے، لیکن ابھی تک کوئی عملی کامیابی حاصل نہیں ہو سکی۔

پاک فضائیہ کی تصدیق:

پاک فضائیہ کے سربراہ ائیر چیف مارشل ظہیر احمد بابر نے پچھلے سال جنوری میں ان طیاروں کے حصول کی تصدیق کی تھی۔ ان کا کہنا تھا کہ جے۔35 طیاروں کی بنیاد رکھ دی گئی ہے اور جلد ہی یہ طیارے فضائیہ میں شامل ہوں گے۔

پاکستانی پائلٹس کی تربیت:

رپورٹس کے مطابق، پاکستانی پائلٹس کو جے۔35 طیاروں کی تربیت کے لیے چین بھیج دیا گیا تھا تاکہ وہ ان جدید طیاروں کو مؤثر طریقے سے استعمال کر سکیں۔ یہ طیارے پہلی بار گزشتہ مہینے چین کی عسکری نمائش میں پیش کیے گئے تھے۔