ذرائع کے مطابق بانی چئیرمین پاکستان تحریک انصاف (پی ٹی آئی) و سابق وزیراعظم عمران خان نے اڈیالہ جیل میں رہنماؤں سے گفتگو کرتے ہوئے راولپنڈی احتجاج ختم کرنے پر شدید برہمی کا اظہار کیا اور سوال کیا کہ احتجاج موخر کرنے کا فیصلہ کس کا تھا ؟ جس پر انہیں بتایا گیا کہ بیرسٹر گوہر علی خان نے احتجاج موخر کرنے کی کال دی۔

پی ٹی آئی رہنما اعظم سواتی نے عمران خان کو بریفنگ دیتے ہوئے بتایا کہ ہمارا احتجاج بڑا زبردست تھا، لوگوں نے مزاحمت کی اور شام تک لڑتے رہے۔ جس پر عمران خان نے بیرسٹر گوہر علی پر برہمی کا اظہار کرتے ہوئے کہا کہ اگر احتجاج کامیاب تھا تو موخر کیوں کیا گیا، بیرسٹر گوہر بزدل آدمی ہے، اسے فارغ کریں۔

سابق وزیراعظم عمران خان نے اعظم سواتی کی بریفنگ پر برہمی کا اظہار کرتے ہوئے کہا کہ آپ کو یہاں صفائیاں دینے کے لیے بھیجا گیا ہے ؟ اگر علی امین گنڈاپور لیاقت باغ پہنچ جاتا تو بڑا لیڈر بن جاتا، میرے اور عوام کے درمیان کوئی غلط فہمی نہیں ہے، عوام فیصلہ کرچکی ہے، قیادت اپنا فیصلہ کرلے۔

عمران خان نے پارٹی رہنماؤں کو ہدایت کی کہ اگلے جمعے ڈی چوک احتجاج کی کال دیں، جو مرضی ہو جائے دو دن لگیں ہر صورت ڈی چوک پہنچنا ہے۔