یہ ویڈیو سوشل میڈیا صارفین کی توجہ کا مرکز بن چکی ہے، اور اس بچے کی معصومانہ شکایت اور پولیس سے گفتگو کو خوب سراہا جا رہا ہے۔

 

ویڈیو میں دیکھا جا سکتا ہے کہ بچہ اسکول یونیفارم میں ملبوس ہے اور پنجابی زبان میں بات کرتے ہوئے پولیس اہلکار سے مطالبہ کر رہا ہے کہ اس کی چوری شدہ مرغی کی بازیابی کے لیے فوری کارروائی کی جائے۔ 

 

بچے کے پُراعتماد لہجے نے سوشل میڈیا صارفین کو متاثر کیا ہے، اور خاص طور پر اس کا سوال کہ "پرچہ کٹوانے کے کتنے پیسے لگیں گے؟" لوگوں کے لیے دلچسپی کا باعث بن رہا ہے۔

 

پولیس اہلکار نے بچے کو تسلی دی کہ ایف آئی آر درج کروانے کے لیے کوئی رقم درکار نہیں ہوتی۔

 

 اس پر بچہ حیرت کے ساتھ مزید سوالات کرتا ہے اور یہ بھی بتاتا ہے کہ کچھ عرصہ قبل وہ ایک اور پولیس افسر کو چوزے چوری ہونے کی شکایت کر چکا تھا، جس پر فوری کارروائی کرتے ہوئے ملزم کو گرفتار کر لیا گیا تھا۔

 

بچہ پولیس اہلکار سے وعدہ کرتا ہے کہ جب وہ اُس کے علاقے میں پانی بھرنے آئے گا تو وہ ملزم کی نشاندہی کرے گا۔ بچے کی باتوں اور معصوم شکایت نے دیکھنے والوں کو نہ صرف مسکرانے پر مجبور کیا بلکہ اس کے اعتماد اور سادگی نے دل بھی جیت لیے ہیں۔

 

 

سوشل میڈیا پر ویڈیو شیئر ہونے کے بعد صارفین کی جانب سے دلچسپ تبصرے کیے جا رہے ہیں۔ کئی صارفین نے پنجاب پولیس سے مطالبہ کیا ہے کہ اس بچے کی چوری شدہ مرغی جلد از جلد بازیاب کی جائے۔ اس واقعے کے تناظر میں مختلف لوگوں نے نظامِ انصاف اور عوام میں پولیس کے امیج پر بھی سوالات اٹھائے ہیں۔

 

ایک صارف، اسامہ زاہد، نے لکھا کہ بچے کا ایف آئی آر درج کروانے کے لیے پیسے پوچھنا دراصل ہمارے نظام کی حالت کو ظاہر کرتا ہے۔ انہوں نے مزید کہا کہ اس سے یہ بھی واضح ہوتا ہے کہ ہماری آئندہ نسلوں کے ذہن میں پولیس کا کیا تاثر پیدا ہو رہا ہے۔

 

 

کئی صارفین نے بچے کی معصومیت کی تعریف کی ہے اور اسے معاشرتی نظام میں موجود خرابیوں کی نشاندہی کا ذریعہ قرار دیا ہے۔ صارفین کا کہنا ہے کہ اس ویڈیو کے ذریعے پولیس کو اپنے رویے اور نظام میں مزید بہتری لانے کے لیے غور کرنا چاہیے تاکہ عوام، خاص طور پر بچے، پولیس کو ایک مثبت اور مددگار ادارہ سمجھیں۔

 

یہ ویڈیو نا صرف ایک معصوم بچے کی شکایت کو اجاگر کرتی ہے بلکہ اس کے ذریعے پولیس اور عوام کے درمیان روابط کے حوالے سے کئی اہم پہلوؤں پر غور کرنے کی ضرورت بھی ظاہر کرتی ہے۔