اسپیکر پنجاب اسمبلی ملک احمد خان کے مطابق، پارلیمان کی نئی قانون سازی کے بعد سابقہ قانونی وضاحت کی بنیاد پر فیصلے کرنا مناسب نہیں ہے، اور اس سے موجودہ سیاسی منظر نامے میں پیچیدگیاں پیدا ہو سکتی ہیں۔

 

 

ملک احمد خان نے اپنے خط میں سپریم کورٹ کے 12 جولائی کے فیصلے کا حوالہ دیا جس میں آزاد حیثیت سے منتخب ہونے والے ارکان کو سیاسی جماعت میں شمولیت کا موقع دیا گیا تھا۔

 

 انہوں نے کہا کہ پنجاب اسمبلی میں آزاد حیثیت سے منتخب ہونے والے یہ ارکان پہلے ہی سنی اتحاد کونسل میں شامل ہو چکے ہیں، لیکن عدالت کے فیصلے کے تحت انہیں دوبارہ جماعت کی تبدیلی کا موقع فراہم کیا گیا ہے، جس سے قانونی اور آئینی پیچیدگیاں پیدا ہونے کا خدشہ ہے۔

 

 

خط میں اسپیکر پنجاب اسمبلی نے مزید وضاحت کی کہ پارلیمان نے الیکشن ترمیمی ایکٹ منظور کر لیا ہے، جو صدر پاکستان کی منظوری کے بعد گزٹ آف پاکستان میں بھی شائع ہو چکا ہے۔ اس نئے قانون کے مطابق، مخصوص نشستوں کے معاملے پر کام کرنے کا طریقہ کار تبدیل کیا گیا ہے اور نئی قانون سازی کی روشنی میں فیصلے کیے جانے چاہئیں، نہ کہ سابقہ قانونی وضاحت کی بنیاد پر۔

 

 

ملک احمد خان نے الیکشن کمیشن کو تنبیہ کی کہ اگر پارلیمان سے منظور شدہ نئے الیکشن ترمیمی ایکٹ کے بجائے پرانی قانون سازی پر عملدرآمد کیا جاتا رہا تو اس سے پیچیدہ اور سنگین صورتحال پیدا ہو سکتی ہے۔ 

 

ان کا کہنا تھا کہ الیکشن کمیشن کو پارلیمان کی منظور شدہ ترامیم کا احترام کرتے ہوئے، نئے قوانین کے مطابق کام کرنا چاہیے تاکہ مستقبل میں کسی قسم کی آئینی یا قانونی پیچیدگیاں پیدا نہ ہوں۔

 

اسپیکر پنجاب اسمبلی نے خط کے ذریعے زور دیا کہ الیکشن کمیشن آف پاکستان کو فوری طور پر اس معاملے پر غور کرنا چاہیے اور نئی قانون سازی کے مطابق اقدامات اٹھانے چاہئیں، تاکہ مخصوص نشستوں سے متعلق معاملات کو حل کیا جا سکے اور آئینی بحران سے بچا جا سکے۔