وزیراعظم شہبازشریف نے کابینہ اجلاس سے خطاب کرتے ہوئے کہا کہ گزشتہ سال اگست میں مہنگائی کی شرح 27 فیصد کے قریب تھی، اگست میں مہنگائی کی شرح سنگل ڈیجٹ میں آگئی ہے، وزارت خزانہ، اسٹیٹ بینک اور متعلقہ وزارتیں تعریف کے لائق ہیں۔

شہباز شریف کا کہنا تھا کہ سفر طویل ہے، ہم نے آگے تیزی سے بڑھنا ہے، روزگار کے مؤثر مواقع پیدا کرنا ہماری ترجیح ہے، اخراجات کم کرنے کی پالیسی پر عمل درآمد یقینی بنانا ہے، رائٹ سائزنگ، ڈاؤن سائزنگ یقینی بنانے کےساتھ گردشی قرض کو بھی کم کرنا ہے۔

انہوں نے کہا کہ محصولات کی مد میں بدعنوانی کا خاتمہ کرنا ہے، اسمگلنگ کا خاتمہ کرنا ہے، ان تمام سمتوں میں سنجیدگی سے آگے بڑھ رہے ہیں، اہداف کے حصول پر توجہ مرکوز کر رکھی ہے، دن رات محنت کرنے والی قوموں نے اپنے حالات بہتر کرلیے ہیں۔