آرمی چیف جنرل عاصم منیر نے بڑے صاف الفاظ میں بھارت کو خبردار کیا کہ کسی بھی اشتعال انگیزی یا پاکستان کی خودمختاری کی خلاف ورزی کا فوری اورمؤثر جواب دیا جائے گا۔
آئی ایس پی آر کے مطابق آرمی چیف جنرل سید عاصم منیر نے حاجی پیر سیکٹر لائن آف کنٹرول کا دورہ کیا، فرنٹ لائن پر افسروں اور جوانوں کے ساتھ نمازِ عید ادا کی۔
آرمی چیف نے مادرِ وطن کے دفاع کیلئے فوجیوں کی لگن، بلند حوصلے اور عزم کو سراہتے ہوئے کہا کہ بطور فوجی ہم دورانِ ڈیوٹی اپنے گھروں اور پیاروں سے دور تہوار منانے پر فخر محسوس کرتے ہیں۔
آرمی چیف نے مقبوضہ کشمیر کے معاملے پر یو این قراردادوں کے مطابق پاکستان کے اصولی مؤقف کا اعادہ کیا، کشمیریوں پربھارت کے جاری ظلم وبربریت کی مذمت کی۔
آرمی چیف جنرل عاصم منیر نے کہا کہ انتخابات کے بعد بھارت پاکستان کے خلاف جھوٹا پروپیگنڈا کرنے کی کوشش کر رہا ہے۔ ایسے ہتھکنڈے اور جعلی فلیگ آپریشنز بھارت کا معمول کا سیاسی آلہٰ کار بن چکے، پاکستان نے ہمیشہ خطے میں امن و استحکام کی حمایت کی ہے۔
آرمی چیف کی ایل او سی آمد پر کور کمانڈر راولپنڈی نے ان کا استقبال کیا۔ آرمی چیف نے جوانوں کے ہمراہ پاکستان کی سلامتی اور خوشحالی کی دعا کی اور شہداء کی قربانیوں کو خراجِ عقیدت پیش کیا۔
