عالمی شہرت یافتہ گلوکار عاطف اسلم اپنے وی لاگ مائے بارڈر لیس ورلڈ میں اپنے میوزک کیریئر کے بارے میں بات کرتے ہوئے بتایا کہ مجھے میوزک کے ساتھ اپنے لگاﺅ کا احساس اس وقت ہوا جب میرے والدین نئے گھر میں شفٹ ہوئے، پرانا والا گھر خالی کر دیا تو میں نے پرانے گھر کے اوپر والے حصے میں جا کر گانا شروع کر دیا۔

عاطف اسلم نے بتایا کہ دراصل اس وقت میں صرف 14 سال کا تھا اور میوزک کے تکنیکی پہلوں سے واقف نہیں تھا، مگر پھر آہستہ آہستہ میری ایسے لوگوں سے ملاقات ہوئی جنہیں میوزک کی سمجھ تھی، انہوں نے مجھے بتایا کہ گانے کیسے بنائے جاتے ہیں، گانوں کے بول کس طرح لکھے جاتے ہیں، میوزک ویڈیوز کیسے بنتی ہیں اور اس طرح میرے میوزک کیریئر کا آغاز ہوا۔

انہوں نے کہا کہ مجھے نہیں لگتا کہ میں میوزک کے بغیر زندہ رہ سکتا ہوں، اگر میوزک نہیں ہوگا زندگی بالکل پھیکی سی ہو جائے گی، ایک بڑی دلچسپ بات یہ ہے کہ مصروفیات کی بناءپر میں نے پچھلے کافی عرصے سے میوزک سنا نہیں ہے لیکن ابھی دوبارہ میوزک سننا شروع کیا ہے اور میں اس سے بہت لطف اندوز ہو رہا ہوں، اب نئے آنے والے گلوکاروں، موسیقاروں اور ویڈیو گرافرز کو سامنے آنے کا موقع دینا چاہتا ہوں۔