مقامی صرافہ بازاروں میں سونے کی فی تولہ قیمت ایک مرتبہ پھر 5 لاکھ روپے کی حد عبور کر گئی ہے۔ تازہ اعداد و شمار کے مطابق فی تولہ سونا 5 لاکھ 3 ہزار 462 روپے تک پہنچ گیا ہے، جس سے خریداروں کے لیے سونا مزید مہنگا ہو گیا ہے۔

یہ بھی پڑھیں: ایرانی کرنسی کی قدر میں غیر معمولی اضافہ

دوسری جانب عالمی منڈی میں بھی سونے کی قیمت میں اضافہ دیکھنے میں آیا ہے، جہاں سونا 35 ڈالر فی اونس مہنگا ہونے کے بعد 4 ہزار 811 ڈالر فی اونس کی سطح پر پہنچ گیا ہے۔ ماہرین کے مطابق عالمی سطح پر معاشی غیر یقینی صورتحال اور سرمایہ کاروں کا سونے کی طرف رجحان اس اضافے کی بڑی وجہ ہے۔

چاندی کی قیمت میں بھی نمایاں اضافہ ریکارڈ کیا گیا ہے۔ پاکستان میں فی تولہ چاندی 144 روپے مہنگی ہو کر 8 ہزار 404 روپے تک پہنچ گئی ہے، جس سے زیورات اور دیگر مصنوعات کی قیمتوں پر بھی اثر پڑنے کا امکان ہے۔

ماہرین کا کہنا ہے کہ عالمی معاشی حالات، کرنسی کی قدر میں اتار چڑھاؤ اور سرمایہ کاری کے رجحانات قیمتی دھاتوں کی قیمتوں میں اضافے کا باعث بن رہے ہیں، جبکہ آئندہ دنوں میں بھی ان قیمتوں میں مزید اتار چڑھاؤ دیکھنے میں آ سکتا ہے۔