ہفتے بھر جاری غیر یقینی معاشی صورتحال، سرمایہ کاروں کے محتاط رویے اور فروخت کے دباؤ کے باعث مارکیٹ میں مسلسل اتار چڑھاؤ دیکھنے میں آیا۔

کاروباری ہفتے کے اختتام پر کے ایس ای 100 انڈیکس 4992 پوائنٹس کی نمایاں کمی کے بعد 1 لاکھ 84 ہزار 174 پوائنٹس پر بند ہوا۔ اس دوران مارکیٹ شدید دباؤ میں رہی اور 100 انڈیکس 9071 پوائنٹس کے وسیع بینڈ میں گھومتا رہا، جو سرمایہ کاروں کی بے یقینی کی واضح عکاسی کرتا ہے۔

اعداد و شمار کے مطابق ہفتہ وار بنیاد پر 100 انڈیکس کی بلند ترین سطح 1 لاکھ 91 ہزار 32 پوائنٹس ریکارڈ کی گئی، جبکہ کم ترین سطح 1 لاکھ 81 ہزار 961 پوائنٹس تک گر گئی۔

معاشی ماہرین کا کہنا ہے کہ عالمی مالیاتی رجحانات، مقامی سیاسی صورتحال اور معاشی پالیسیوں سے متعلق خدشات نے سرمایہ کاروں کے اعتماد کو متاثر کیا۔

یہ بھی پڑھیں:پیٹرول سستا ہوگا یا مہنگا؟ جانیے

بازارِ حصص میں ہفتے بھر کے دوران مجموعی طور پر 4.31 ارب شیئرز کے سودے طے پائے، جن کی مجموعی مالیت 276 ارب روپے رہی۔ تاہم مارکیٹ کیپٹلائزیشن میں نمایاں کمی دیکھنے میں آئی اور یہ 391 ارب روپے کی کمی کے بعد 20827 ارب روپے پر آ گئی۔

تجزیہ کاروں کے مطابق اگرچہ مارکیٹ اس وقت دباؤ کا شکار ہے، تاہم مستقبل میں معاشی استحکام، پالیسیوں میں وضاحت اور مثبت معاشی اشاروں کی صورت میں سرمایہ کاروں کا اعتماد بحال ہو سکتا ہے۔ موجودہ صورتحال میں سرمایہ کاروں کو محتاط حکمت عملی اختیار کرنے کا مشورہ دیا جا رہا ہے۔