نیشنل الیکٹر ک پاور ریگولیٹری اتھارٹی (نیپرا) کی جانب سے ڈسکوز کی سہ ماہی ایڈجسٹمنٹ کی درخواست پر سماعت کا اعلامیہ جاری کردیا گیا، ڈسکوز کی جانب سے فیول پرائس ایڈجسٹمنٹ کی مد میں 53 ارب روپے سے زائد کے ریلیف کی درخواست کی گئی تھی۔

نیپرا کی جانب سے جاری اعلامیہ کے مطابق ڈسکوز نے مالی سال 25-2024 کی چوتھی سہ ماہی ایڈجسٹمنٹ کی مد میں درخواست دی تھی، اگر نیپرا درخواست منظور کر لے تو بجلی صارفین کو فی یونٹ ایک روپے 80 پیسے کا ریلیف ملے گا۔

نیپرا فراہم کردہ ڈیٹا کی مزید جانچ پڑتال کے بعد اپنا تفصیلی فیصلہ جاری کرے گی، سہ ماہی ایڈجسٹمنٹ کا اطلاق کے الیکٹرک سمیت سرکاری ڈسکوز پر بھی ہوگا ۔

حکام کی جانب سے بتایا گیا کہ سرکلر ڈیٹ 2300 ارب روپے سے کم ہو کر 1600 ارب روپے رہ گیا ہے، بجلی تقسیم کار کمپنیوں کی کارکردگی میں بہتر ی آنے سے سرکلر ڈیٹ میں 200 ارب روپے کی کمی آئی، نیلم جہلم ہائیڈرو پاور پلانٹ بند ہونے سے 18 ارب روپے کا فرق آیا ہے۔

یہ بھی پڑھیں: ایل پی جی سستی، گھریلو سلنڈر کی قیمت میں 209 روپے سے زائد کی کمی

ڈسکوز حکام کے مطابق ٹرانسمیشن اینڈ ڈسٹری بیوشن لاسز بھی کم ہوئے ہیں، تمام ڈسکوز کی بجلی کی کھپت میں اوسطاً 31 فیصد اضافہ ہوا ہے، صرف کوئٹہ الیکٹرک سپلائی کمپنی کی بجلی کی فروخت میں کمی آئی ہے۔

دوران سماعت نیپرا کی جانب سے بجلی کی صنعتی گروتھ میں اضافے کے سوال اٹھائے گئے، اس حوالے سے ڈسکوز کا کوئی بھی سی ای او اتھارٹی کو تسلی بخش جواب نہ دے سکا۔

حکام نے کہا کہ حکومت ڈائریکٹ سبسڈی اور کراس سبسڈی میں اصلاحات پر کام کر رہی ہے، بینکوں سے 1275 ارب روپے کا قرضہ لے کر واپسی کیلئے کوئی الگ سرچارج نہیں لگایا جائے گا۔