ملک بھر میں سونے کی قیمت میں 6100 روپے فی تولہ اضافہ ہوا ہے، جس کے بعد فی تولہ سونا 3 لاکھ 56 ہزار روپے سے بھی تجاوز کرگیا ہے۔
آل پاکستان جیمز اینڈ جیولر ایسوسی ایشن کے مطابق 10 گرام سونے کی قیمت میں بھی 5 ہزار 232 روپے کا اضافہ ہوا، جس کے بعد اس کی نئی قیمت 3 لاکھ 53 ہزار روپے ہوچکی ہے۔
دوسری جانب عالمی منڈی میں بھی سونے کی قیمت میں نمایاں اضافہ دیکھنے کو ملا ہے۔ بین الاقوامی مارکیٹ میں فی اونس سونا 61 ڈالر اضافے کے ساتھ 3377 ڈالر پر پہنچ گیا ہے۔ ماہرین کا کہنا ہے کہ عالمی سطح پر معاشی غیر یقینی صورتحال مہنگائی اور کرنسی کی گرتی ہوئی قدر سونے کی قیمت میں اضافے کی بڑی وجوہات ہیں۔
واضح رہے کہ سونے کی قیمت میں یہ اچانک اور بڑا اضافہ زیورات خریدنے والوں، سرمایہ کاروں اور شادیوں کے سیزن میں خریداری کے خواہشمند افراد کیلئے کسی جھٹکے سے کم نہیں۔
ماہرین کا کہنا ہے کہ اگر عالمی مارکیٹ میں یہی رجحان برقرار رہا تو آنے والے دنوں میں سونے کی قیمت مزید بلندیوں کو چھو سکتی ہے۔
