بین الاقوامی میڈیا کی جانب سے جاری کردہ رپورٹس کے مطابق بدھ کو خام تیل کی قیمتوں میں کمی ریکارڈ کی گئی ہے، برینٹ فیوچر 36 سینٹ یا 0.47 فیصد کی کمی کے ساتھ 76.64 ڈالر فی بیرل پر آ گیا، جبکہ یو ایس ویسٹ ٹیکساس انٹرمیڈیٹ (ڈبلیو ٹی آئی) خام تیل کی قیمت میں 37 سینٹ یا 0.5 فیصد کی کمی آئی اور یہ 72.95 ڈالر فی بیرل پر پہنچ گئی۔

واضح رہے کہ اس کمی کا سبب امریکی خام تیل کے ذخائر میں اضافہ ہے، جس کا انکشاف ایک انڈسٹری رپورٹ میں کیا گیا ہے۔ امریکہ میں خام تیل کے ذخائر 7 فروری کو ختم ہونے والے ہفتے میں 9.4 ملین بیرل بڑھ گئے۔اس اضافے نے عالمی منڈی میں تیل کی قیمتوں پر دباؤ ڈالا، کیونکہ امریکی ذخائر میں اضافے کا مطلب ہے کہ عالمی سطح پر تیل کی فراہمی میں کوئی کمی نہیں آ رہی۔

دوسری جانب عالمی سطح پر جاری تجارتی کشیدگی اور امریکی ٹیرف سے متعلق خدشات نے بھی مارکیٹ کے جذبات پر اثر ڈالا ہے۔امریکی پابندیوں کے باعث چین اور بھارت کو روسی تیل کی ترسیل میں رکاوٹیں پیش آرہی ہیں، جس سے عالمی اقتصادی ترقی اور توانائی کی طلب پر منفی اثرات مرتب ہو سکتے ہیں۔