اسٹیٹ بینک آف پاکستان کے جاری کردہ تازہ اعدادوشمار کے مطابق دسمبر 2024 کے دوران غیر ملکی ترسیلات زر میں نمایاں اضافہ ریکارڈ کیا گیا ہے۔

 

 

اسٹیٹ بینک کی رپورٹ کے مطابق دسمبر 2024 کے دوران بیرون ملک پاکستانیوں نے 3.1 ارب ڈالر کی ترسیلات زر بھیجیں۔ یہ اعدادوشمار پچھلے سال کے اسی مہینے کے مقابلے میں 29.3 فیصد زیادہ ہیں، جبکہ نومبر 2024 کے مقابلے میں بھی 5.6 فیصد کا اضافہ ریکارڈ کیا گیا ہے۔

 

 

مالی سال 2024-25 کی پہلی ششماہی کے دوران مجموعی ترسیلات زر 17.8 ارب ڈالر تک پہنچ گئیں، جو پچھلے سال کی پہلی ششماہی کے 13.4 ارب ڈالر سے 32.8 فیصد زیادہ ہیں۔ ترجمان اسٹیٹ بینک کے مطابق یہ اضافہ پاکستانی معیشت کے لیے ایک مثبت پیشرفت ہے۔

 

 

دسمبر 2024 میں ترسیلات زر کے اہم ذرائع سعودی عرب (770.6 ملین ڈالر)، متحدہ عرب امارات (631.5 ملین ڈالر)، برطانیہ (456.9 ملین ڈالر) اور امریکا (284.3 ملین ڈالر) رہے۔ ان ممالک سے آنے والی رقوم پاکستانی معیشت کے لیے اہم ثابت ہو رہی ہیں۔

 

 

پاکستان تحریک انصاف کے ترجمان شیخ وقاص اکرم نے پشاور میں ایک پریس کانفرنس کے دوران کہا کہ عمران خان کی ہدایت پر تحریک کے تحت بیرون ملک پاکستانیوں سے ترسیلات زر نہ بھیجنے کی اپیل کی گئی تھی۔ انہوں نے مزید کہا کہ حکومت سے مذاکرات کے دوران 9 مئی اور 26 نومبر کے واقعات کی تحقیقات کے لیے جوڈیشل کمیشن کے قیام کے بعد یہ کال واپس لی جا سکتی ہے۔

 

 

عمران خان کی اپیل کے باوجود ترسیلات زر میں ریکارڈ اضافہ یہ ظاہر کرتا ہے کہ بیرون ملک مقیم پاکستانیوں کی اکثریت نے اس کال پر عمل نہیں کیا۔ معاشی ماہرین اس پیشرفت کو ملک کے لیے ایک مثبت اشارہ قرار دے رہے ہیں۔