رپورٹ کے مطابق، مالی سال 2024 ء میں معیشت میں بہتری کے واضح آثار ہیں اور مہنگائی کی شرح میں نمایاں کمی دیکھنے کو ملی ہے۔ اے ڈی بی کے مطابق، میکرو اکنامک استحکام کے اشاریے بھی مثبت دکھائی دے رہے ہیں۔

 

 

رپورٹ کے مطابق، مالی سال 2024 ء میں پاکستان کی معاشی ترقی کی شرح 2.4 فیصد تک رہنے کی توقع ہے، جبکہ مالی سال 2025 ء میں یہ شرح 2.8 فیصد تک پہنچ سکتی ہے۔ تاہم، یہ پیش رفت حکومت کے اصلاحاتی ایجنڈے پر عمل درآمد اور پالیسی کے تسلسل سے مشروط ہے۔ اگر پاکستان اپنے معاشی اصلاحات کو جاری رکھتا ہے تو معاشی ترقی کی رفتار میں مزید اضافہ ممکن ہے۔

 

 

رپورٹ میں کہا گیا ہے کہ حکومتی اخراجات میں کمی اور نجی شعبے کو فروغ دینے جیسے اقدامات پاکستانی معیشت کے استحکام کے لیے ضروری ہیں۔ ان پالیسیوں کے تسلسل سے ہی معیشت میں مزید بہتری آئے گی۔ مالیاتی اور معاشی استحکام کی بحالی کے لیے اصلاحاتی اقدامات کی کامیابی اہم ہے۔

 

 

مالی سال 2023 ء میں مہنگائی کی شرح 29.2 فیصد تک پہنچ گئی تھی، تاہم 2024 میں یہ کم ہو کر 23.4 فیصد پر آ گئی ہے۔ رپورٹ کے مطابق، مالی سال 2024ء کی پہلی ششماہی میں مہنگائی کی شرح زیادہ رہی، لیکن دوسری ششماہی میں اس میں کمی دیکھی گئی۔ اس کمی کے باعث شرح سود میں بھی کمی کا رجحان سامنے آیا ہے، جو ملکی معیشت کے استحکام کے لیے ایک مثبت علامت ہے۔

 

 

اے ڈی بی کی رپورٹ میں توقع ظاہر کی گئی ہے کہ مالی سال 2025 ء میں پاکستان میں مہنگائی کی شرح مزید کم ہو کر 15 فیصد تک پہنچ سکتی ہے۔ اس بہتری کی وجوہات میں منظم شرح سود اور ایکسچینج ریٹ میں استحکام شامل ہیں۔ ان عوامل کی مدد سے پاکستانی معیشت میں مہنگائی پر قابو پانے میں مزید کامیابی حاصل ہو سکتی ہے۔

 

 

رپورٹ میں یہ نتیجہ اخذ کیا گیا ہے کہ پاکستانی معیشت بہتری کی جانب گامزن ہے، لیکن اس کے لیے پالیسیوں کا تسلسل اور معاشی اصلاحات ضروری ہیں۔ مہنگائی کی شرح میں کمی اور استحکام کی جانب پیش قدمی ایک مثبت اشاریہ ہے، جو آنے والے سالوں میں معیشت کو مزید مضبوط کر سکتی ہے۔