میونخ:(ویب ڈیسک) جرمنی سے بینکاک جانیوالے طیارے میں میاں بیوی کی لڑائی ہو گئی، طیارے کو نئی دہلی میں ائیرپورٹ پر ہنگامی لینڈنگ کرنا پڑ گیا۔ عالمی میڈیا کی رپورٹس کے مطابق طیارے نے جرمنی کے شہر میونخ سے اڑان بھری تو پرواز کے دوران میاں بیوی آپس میں جھگڑا کرنے لگ گئے جس پر طیارے کی عملے نے دونوں کو سمجھایا مگر وہ دونوں میاں بیوی باز نہیں آئے اور مسلسل لڑتے رہے جب صورتحال زیادہ بگڑگئی تو پائلٹس نے ہنگامی لینڈنگ کا فیصلہ کیا۔ میڈیا رپورٹ کے مطابق تھائی لینڈ سے تعلق رکھنے والی بیوی نے اپنے جرمن شوہر کیخلاف طیارے کے پائلٹ سے شکایت کی تھی کہ وہ اسے دھمکا رہا ہے،پائلٹ نے نئی دہلی میں ہنگامی لینڈنگ کی جہاں دونوں مسافروں کو اتار دیا گیا۔ طیارے کے پائلٹس نے بھارت سے پہلے طیارے کو پاکستان کیطرف موڑنے کی اجازت مانگی تھی لیکن اجازت نہ ملنے پر پائلٹ نے نئی دہلی میں ہنگامی لینڈنگ کی ، مسافر شوہر نشے کی حالت میں لگ رہا تھا، میاں بیوی کو اندرا گاندھی ائیرپورٹ پر سیکیورٹی کے حوالے کرکے طیارہ دوبارہ بینکاک کیطرف روانہ ہوگیا۔ یہ بھی پڑھیں https://sunonews.tv/29/11/2023/latest/56947/ بھارتی میڈیا کا کہنا ہے کہ ایوی ایشن حکام نے میاں بیوی کے حوالے سے جرمنی کے سفارتخانے سے رابطہ کیا ہے مگر ابھی یہ فیصلہ نہیں ہوا کہ دونوں کو پولیس کے حوالے کیا جائے گا یا سفارتخانے بھیجا جائے گا۔ یہاں میڈیا کا یہ بھی کہنا ہے کہ شناخت ظاہر نہ کیے جانیوالے میاں بیوی نے بھارت میں اترنے کے بعد طیارے کے عملے سے اپنے رویے پر معافی مانگی تھی اوردوبارہ جہاز میں سفر جاری رکھنے کی درخواست بھی کی تھی جسے منظور نہیں کیا گیا تھا۔