راولپنڈی: (رپورٹ، غزالہ نورین) لکی مروت میں تین مقامات پردہشت گردوں کے حملے پسپا، سیکیورٹی فورسز کیساتھ جھڑپ میں سات امن دشمن نشان عبرت، مرنے والوں میں دہشت گرد موسیٰ خان بھی شامل، پاک فوج کے تین جوانوں نے جام شہادت نوش کیا۔

تفصیل کے مطابق خیبر پختونخوا کے علاقے لکی مروت میںسیکیورٹی فورسز اور دہشتگردوں کے مابین جھڑپیں ہوئیں، تین مقامات پر دہشتگردوں کے حملے پسپا کر دیے گئے۔ پاک فوج کی بھرپورجوابی کاررروائی میں کمانڈر موسی ٰ خان سمیت 7 دہشتگرد ہلاک ہو گئے۔ پاک فوج کے تین جوان بھی جام شہادت نوش کر گئے ۔

پاک فوج کے شعبہ تعلقات عامہ (آئی ایس پی آر )کے مطابق پہلے واقعے میں موٹر سائیکل سوار دہشت گرد نےسیکیورٹی چیک پوسٹ کے قریب خود کش حملہ کیا جبکہ لکی مروت کےعلاقوں امیرکلام اورتجبی خیل میں دہشتگردوں کیساتھ فائرنگ کاتبادلہ ہوا ۔

سیکیورٹی فورسز نے دہشتگردوں کو بھاری نقصان پہنچایا جبکہ نائب صوبیدارتاج میر، حولدارذاکراحمداورسپاہی عابد بھی بہادری سے لڑتے ہوئے شہید ہوئے ۔

ترجمان پاک فوج کاکہناہے کہ دہشتگردوں کے خاتمے کے لیے علاقے میں سرچ آپریشن جاری ہے ، افواج پاکستان ملک سے دہشتگردی کے خاتمے کے لیے پرعزم ہیں اورجوانوں کی یہ قربانیاں ہمارے عزم کو مزید پختہ کرتی ہیں۔

یہ بھی پڑھیں: وادی تیراہ میں آپریشن، پاک فوج کے 2 جوان وطن کیلئے قربان

خیال رہے کہ 26 اپریل کو ضلع خیبر کے علاقے وادی تیرا ہ میں سیکیورٹی فورسزنے آپریشن کرکے دو دہشت گردوں کو جہنم واصل جبکہ چار کو شدید زخمی کردیا تھا۔ فائرنگ کے تبادلے میں پاک فوج کے دو جوانوں نے جام شہادت نوش کیا۔

پاک فوج کے شعبہ تعلقاتِ عامہ (آئی ایس پی آر) کی جانب سے جاری بیان کے مطابق دہشت گردوں کے خلاف سیکیورٹی فورسز کا آپریشن25 اپریل 2023 ءکو خیبر کے ضلع تیراہ میں کیا گیا۔

اس آپریشن کے دوران سیکیورٹی فورسز اوردہشت گردوں کے درمیان شدید فائرنگ کا تبادلہ ہوا۔ سیکیورٹی فورسز نے مؤثر کاروائی کر کے دو دہشت گردوں کو واصلِ جہنم جبکہ چار کو زخمی کر دیا۔

اس دوران دہشت گردوں کی تحویل سے بھاری مقدار میں اسلحہ اور گولہ بارود بھی برآمد کیا گیا۔ تاہم فائرنگ کے شدید تبادلے کے دوران 24 سالہ سپاہی باسط علی اور 26 سالہ سپاہی وقاص علی شاہ نے جوانمردی سے مقابلہ کرتے ہوئے جامِ شہادت نوش کیا۔

شہید باسط علی پشاور جبکہ شہید سپاہی وقاص علی شاہ چارسدہ کے رہائشی تھے۔ دہشت گردوں کو کیفرِ کردار تک پہنچانے کیلئے علاقے میں سیکورٹی فورسز کا سرچ آپریشن جاری ہے۔ سیکیورٹی فورسز کی قربانیاں دہشت گردی کے ناسُور کو جڑ سے ختم کرنے کیلئے ہمارے عزم کو مضبوط کرتی ہیں۔