12 April 2024

Homeتازہ ترینالخدمت فاؤنڈیشن کی غزہ متاثرین کیلئے امدادی سامان کی پہلی کھیپ روانہ

الخدمت فاؤنڈیشن کی غزہ متاثرین کیلئے امدادی سامان کی پہلی کھیپ روانہ

الخدمت فائونڈیشن کے کارکن غزہ متاثرین کیلئے امدادی سامان ٹرک پر لوڈ کر رہے ہیں

الخدمت فاؤنڈیشن کی غزہ متاثرین کیلئے امدادی سامان کی پہلی کھیپ روانہ

لاہور: (سنو نیوز) الخدمت فاؤنڈیشن کے تحت غزہ متاثرین کے لیے امدادی سامان کی پہلی کھیپ روانہ کر دی گئی۔ 13ٹرکوں پر مشتمل امدادی سامان میں غذائی اجناس، ادویات ، ڈیلیوری کٹس، بے بی کٹس، ہائی جین کٹس، مچھر دانیاں اور ضرورت کی دیگر اشیاء موجود ہیں۔

اس موقع پر الخدمت فاؤنڈیشن پاکستان کے سیکرٹری جنرل سید وقاص جعفری نے میڈیا سے گفتگو کرتے ہوئے بتایا کہ پہلے مرحلے میں یہ امدادی سامان این ڈی ایم اے (نیشنل ڈیزاسٹر مینجمنٹ اتھارٹی) کی مدد سے مصر رفح بارڈر پہنچایا جائے گا، جس کے بعد یہ سامان غزہ پہنچے گا۔

الخدمت فائونڈیشن کی خاتون کارکن غزہ متاثرین کیلئے ادویات پیک کر رہی ہے

انہوں نے کہا کہ امدادی سامان بھجوانے کے حوالے سے این ڈی ایم اے سے مسلسل رابطے میں ہیں اور غزہ میں بھجوایا گیا امدادی سامان این ڈی ایم اے کے ایس او پیز کے مطابق مینج اور پیک کیا گیا ہے۔

سید وقاص جعفری نے کہا کہ غزہ اِس وقت شدید انسانی بحران کا شکار ہے جہاں پانی، خوراک ، طبی امداد اور ہائی جین کی اشد ضرورت ہے۔ الخدمت فاؤنڈیشن نے صورتحال خراب ہونے کے فوری بعد غزہ میں موجود بین الاقوامی رفاہی اداروں کے اشتراک سے میسر و موجود وسائل کو بروئے کار لاتے ہوئے امدادی سرگرمیوں کا آغاز کیا، جہاں متاثرین میں تیار کھانے، خشک راشن، ادویات، ہائی جین کٹس اور ونٹر پیکج کی فراہمی کا کام جاری ہے۔

 الخدمت فاؤنڈیشن پاکستان کے سیکرٹری جنرل سید وقاص جعفری کی میڈیا سے گفتگو اس موقع پر ان کے اردگرد لوگ کھڑے ہیں

الخدمت فاؤنڈیشن کے تحت اب تک 15 کروڑ کا امدادی سامان فراہم کیا جا چکا ہے اور مزید1 ارب روپے بھی غزہ متاثرین کے لیے مختص کر دیے گئے ہیں۔ انہوں نے کہاکہ ہماری خواہش ہے کہ امدادی سامان جلدازجلد متاثرین تک پہنچے پاکستان سمیت دیگرمتعلقہ ممالک سے ہماری اپیل ہے سامان کی ترسیل میں اپنا مثبت اور موثر کردار ادا کریں تاکہ معصوم بچوں، خواتین سمیت عام شہریوں کی جانیں بچائی جاسکیں۔

Share With:
Rate This Article