لاہور: (سنو نیوز) پاکستان مسلم لیگ (ن) پنجاب کے صدر رانا ثناء اللہ نے نگران وزیر داخلہ کے بیان کو "حد سے تجاوز" قرار دے دیا۔ انہوں نے کہا کہ سرفراز بگٹی صاحب بیان دینے سے پہلےشیخ رشید کا انجام دیکھ لیں۔ پاکستان مسلم لیگ (ن) کے رہنما رانا ثنااللہ نے نگران وزیر داخلہ نواز شریف کی گرفتاری کے بیان پر ردعمل دیتے ہوئے کہا کہ نواز شریف کے خلاف سازش کا خمیازہ عوام اور ملک نے بھگتا ہے، نواز شریف کے خلاف جھوٹے کیس بنا کر ملک اور عوام کے ساتھ دشمنی کی گئی، نواز شریف پر اللہ تعالیٰ کی رحمت اور نیچے عوام کی فورس ہے۔ رانا ثنااللہ کا کہنا تھا کہ سرفراز بگٹی بیان بازی سے اپنا قد بڑھانے کی کوشش نہ کریں، نواز شریف جیلوں اور فورس کا سامنا کرچکے ہیں، نواز شریف کی فکر چھوڑیں اپنے کام پہ توجہ دیں، نواز شریف نے ائیرپورٹ سے 21 اکتوبر کو کہاں جانا ہے یہ عوام کا فیصلہ ہو گا، نواز شریف ہمیشہ کی طرح عدالتوں میں قانون تقاضے پورے کریں گے۔ ادھر مسلم لیگ ن کی مرکزی سیکرٹری اطلاعات سابق وفاقی وزیر مریم اورنگزیب نے سماجی رابطے کی ویب سائٹ ایکس پر ٹویٹ کرتے ہوئے کہا کہ سرفراز بگٹی صاحب جتنا سیاسی قد ہے اتنی بات کریں، نواز شریف نے ائیر پورٹ سے کہاں جانا ہے یہ نہ آپ کا مسئلہ ہے اور نہ آپ کا فیصلہ۔ مریم اورنگزیب کا کہنا تھا کہ اپنی فورس اور تیاری عوام کو تحفظ اور امن فراہم کرنے کے لئے استعمال کریں، قائد نواز شریف نے 21 اکتوبر کو ایئرپورٹ سے کہاں جانا ہے؟ یہ نواز شریف اور عوام کا فیصلہ ہوگا۔ لیگی رہنما نے کہا کہ نواز شریف اس ملک کے تین دفعہ کے منتخب وزیراعظم ہیں جس پہ جھوٹے کیس بنا کر بے بنیاد الزام لگا کر ناحق سزا دی گئی، ان سے انتقام اور دشمنی لیتے لیتے ملک کا ہر شعبہ برباد کر دیا، عوام کو بھوکا اور بے روزگار کر دیا گیا۔ انہوں نے کہا کہ جس کرسی پہ تھوڑی مدت کے لئے بیٹھے ہیں اسے "تاحیات" نہ سمجھنے کی غلط فہمی سے باہر آجائیں، نواز شریف کی نہیں ملک کی فکر کریں، 2017 سے لے کر اب تک اِس طرح کے جھوٹے پروپیگنڈے اور سازش سے عوام کے ساتھ بہت ناانصافی ہوگئی، اب بس۔ یاد رہے گزشتہ روز نگران وفاقی وزیرداخلہ سرفراز بگٹی کا نجی ٹی وی کو انٹریو دیتے ہوئے کہنا تھا کہ نوازشریف کی گرفتاری کے لیے تیار ہیں، ایک ملزم کو جہاز سے گرفتار کرنے کے لیے کوئی بڑی فورس نہیں چاہیے ہوتی، نواز شریف کو عدالت سے ضمانت نہیں ملی تو گرفتار کریں گے، میرے خیال میں نواز شریف خود بھی گرفتار ہونا ہی چاہیں گے، ایئرپورٹ حساس جگہ ہے وہاں مجمع کو اجازت نہیں دیں گے۔