کراچی:(سنونیوز)انٹربینک میں روپے کی قدر میں بہتری ،انٹربینک میں ڈالرایک روپے16پیسےسستا ہوگیا ہے۔

تفصیلات کے مطابق امریکی ڈالرکالین دین 290 روپے60 پیسےپرکیاگیا۔ گذشتہ ہفتے ڈالر 291 روپے 76 پیسے پر بند ہوا تھا۔انٹربینک میں ڈالر 6 ہفتے کی کم ترین سطح پر ٹریڈ ہوا۔اوپن مارکیٹ میں ڈالر کی قدر میں کمی ہونے کے بعد ڈالر 50 پیسے سستا ہوگیا اوپن مارکیٹ میں ڈالر 293 روپے کا ہوگیا۔گزشتہ ہفتے ڈالر 293 روپے 50 پیسے پر بند ہوا تھا۔

حالیہ پانچ برس پاکستانی کرنسی کے لئے انتہائی کٹھن اور مشکل سال ثابت ہوئے،دو ہزار اٹھارہ سے دو ہزار تئیس تک ہر سال روپے کی قیمت میں اوسطً پندرہ فیصد کمی ریکارڈ کی گئی۔

سیاسی غیر یقینی صورتحال، ڈالر کی ذخیرہ اندوزی اور اسمگلنگ نے پاکستانی روپے کو ایک ایسے بحران میں دھکیل دیا جس کا اختتام نظر نہیں آ رہا ہے۔ اسٹیٹ بینک کے مطابق دو ہزار اٹھارہ سے دو ہزار تئیس کے پانچ برسوں میں امریکی ڈالر نے روپے کو کہیں کا نہ چھوڑا۔

2018 میں پی ٹی آئی کی حکومت آنے کے بعد نہ صرف مقامی بلکہ غیر ملکی قرضوں نے تاریخ کی بلند ترین سطح کو چھو لیا، بڑھتے قرضوں کے باعث روپیہ دباؤ کا شکار رہا۔

اسٹیٹ بینک کے مطابق یکم جنوری کو ڈالر کی پاکستانی کرنسی میں شرح تبادلہ ایک سو دس روپے تھی جو ان پانچ برسوں میں دو سو نوے پر جا پہنچی ہے۔غیر ملکی قرضوں کی واپسی اور آئی ایم ایف معاہدے کی سخت ترین شرائط نے روپے کو تنِ تنہا کر دیا جس پر حکومت چاہ کر بھی مدد نہیں کر سکی ۔

نگران حکومت کے ذخیرہ اندوزوں، اسمگلرز اور ہنڈی حوالہ کے غیر قانونی کاروبار کے خلاف ملک گیر کریک ڈاؤن سے روپے کی ساکھ بحال ہونے کی امید پیدا ہوئی ہے۔

یہ بھی پڑھیں:ڈالر کی قیمت میں بڑی کمی،روپیہ بہتر ہونے لگا

چند دنوں سے انٹربینک میں روپیہ مسلسل تگڑا ہوتا جا رہا ہے جبکہ ڈالر کے کمزور ہونے کا سلسلہ جاری ہے، انٹر بینک میں آج کاروبار کے آغاز پر ڈالر 1 روپے 16 پیسے مزید سستا ہوگیا جس کے بعد ڈالر 290 روپے 60 پیسے پر ٹریڈ ہو رہا ہے۔

اوپن مارکیٹ میں بھی ڈالر کی قدر میں کمی ہوئی ہے، اوپن مارکیٹ میں ڈالر 50 پیسے سستا ہوا، اوپن مارکیٹ میں ڈالر 293 روپے کا ہو گیا جبکہ گذشتہ ہفتے اوپن مارکیٹ میں ڈالر 293 روپے 50 پیسے پر بند ہوا تھا۔۔

پاکستان اسٹاک مارکیٹ میں کاروباری ہفتے کا مثبت آغاز دیکھنے میں آیا ، 100 انڈیکس 64 پوائنٹس اضافے سے 46486 کی سطح پر ٹریڈ کیا۔

خیال رہے کہ گذشتہ ہفتے ڈالر کے ذخیرہ اندوزوں اور اسمگلرز کے خلاف کریک ڈاؤن کے باعث انٹربینک میں ڈالر پانچ روپے نو پیسے جبکہ اوپن مارکیٹ میں ساڑھے تین روپے سستا ہوا۔

ڈالر کی غیر قانونی تجارت، ذخیرہ اندوزی اور اسمگلنگ کے خلاف اقدامات سے جہاں کرنسی مارکیٹ میں روپے کی ساکھ بحال ہوئی وہیں اس کا فائدہ اسٹاک مارکیٹ کو بھی پہنچا۔