سیکیورٹی فورسز کا انٹیلیجنس آپریشن، 3 دہشتگرد جہنم واصل

راولپنڈی: (سنو نیوز) سیکیورٹی فورسز کے انٹیلیجنس اطلاعات پر آپریشن میں 3 دہشتگرد جہنم واصل ہوگئے۔ دہشت گردوں کے قبضے سے ہتھیار اور گولہ بارود برآمد کرلیا گیا۔

آئی ایس پی آر کے مطابق سیکیورٹی فورسز نے انٹیلیجنس اطلاعات پر ڈیرہ اسماعیل خان کے علاقہ کلاچی میں آپریشن کیا، جہاں سیکیورٹی فورسز اور دہشتگردوں کے مابین شدید فائرنگ کا تبادلہ ہوا جس میں 2 دہشتگرد جہنم واصل ہوگئے۔

سیکیورٹی فورسز کی کارروائی، 4 دہشتگرد جہنم واصل

سیکیورٹی فورسز کی جنوبی وزیرستان کے علاقہ کوٹ اعظم میں ایک اور کارروائی میں ایک اور دہشتگرد جہنم واصل ہوگیا۔ مارے گئے تینوں دہشت گردوں کے قبضہ سے ہتھیار اور گولہ بارود برآمد کرلیا گیا۔ مارے گئے تمام دہشت گرد سیکیورٹی اور عام شہریوں کے خلاف دہشت گردوں کی متعدد سنگین وارداتوں میں ملوث تھے۔

آئی ایس پی آر کے مطابق شمالی وزیرستان کے علاقے غاریوم میں دیسی ساختہ بارودی سرنگ دھماکے میں پاک فوج کے سپاہی شاہ زیب جام شہادت نوش کر گئے۔ سپاہی شاہ زیب شہید کی عمر 26 سال اور تعلق راولپنڈی سے تھا۔ نواحی علاقے میں کسی بھی دہشتگرد کے خاتمے کے لیے آپریشن بدستور جاری ہے۔

آئی ایس پی آر کے مطابق پاکستان کی سیکیورٹی فورسز دہشتگردی کی لعنت کے جڑ سے خاتمے کے لیے پرعزم ہیں، بہادر جوانوں کی لازوال قربانیاں ہمارے عزم کو مزید مضبوط کرتی ہیں۔

یاد رہے کہ 6 نومبر کو سیکیورٹی فورسز نے خیبر پختونخوا کے علاقے وادی تیراہ میںانٹیلی جنس بیسڈ آپریشن کیا۔ دشمنوں کیساتھ جوانمردی سے لڑتے ہوئے پاک فوج کے افسر سمیت 4 جوان شہید ہوئے۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے خیبر پختونخوا کے علاقے وادی تیراہ میں انٹیلی جنس بیسڈ آپریشن کیا۔ سیکیورٹی فورسز کے اہم ترین آپریشن کی قیادت لیفٹیننٹ کرنل محمد حسن حیدر کر رہے تھے۔

آئی ایس پی آر کے مطابق سیکیورٹی فورسز کے آپریشن کے نتیجہ میں تین دہشت گرد جہنم واصل جبکہ تین زخمی ہو گئے۔ سیکیورٹی فورسز اور دہشتگردوں کے مابین فائرنگ کے تبادلے میں لیفٹیننٹ کرنل محمد حسن حیدر سمیت چار جوانوں شہادت کا مرتبہ حاصل کر لیا۔

لیفٹیننٹ کرنل محمد حسن حیدر کی عمر 43 سال اور تعلق اسلام آباد سے تھا۔ شہدا میں نائیک خوشدل خان، نائیک رفیق خان اور لانس نائیک عبدالقادر شامل ہیں۔

پاک فوج کا کہنا ہے کہ سیکیورٹی فورسز دہشت گردی کے خاتمے کے لیے پرعزم ہیں۔ بہادرجوانوں کی یہ قربانیاں ہمارے عزم کومزیدتقویت دیتی ہیں۔ نائیک خوشدل خان شہید کی عمر 31 سال، تعلق لکی مروت ، نائیک رفیق خان شہید کی عمر 27 سال، تعلق چارسدہ جبکہ لانس نائیک عبدلقادر کی عمر 33 سال اور تعلق مری سے تھا۔

واضح رہے کہ 4 نومبر کی صبح دہشتگردوں نے پاک فضائیہ کی میانوالی ٹریننگ ائیر بیس پر حملہ کیا جسے مستعد اور چوکس سیکیورٹی اہلکاروں نے بروقت جوابی کارروائی کرتے ہوئے ناکام بنا دیا۔

آئی ایس پی آر کا کہنا ہے کہ میانوالی ائیر بیس پر بزدلانہ اور ناکام دہشت گردانہ حملہ کیا گیا، ممکنہ خطرے کو ختم کرنے کے لیے سیکیورٹی فورسز کی جانب سے کامیاب کلیئرنس آپریشن شروع کیا گیا۔ غیر معمولی جرات اور بروقت جوابی کارروائی کا مظاہرہ کرتے ہوئے 9 دہشت گردوں کو جہنم واصل کر دیا گیا۔

دہشتگردوں کے ناکام حملے میں فنکشنل آپریشنل اثاثوں میں سے کسی کو کوئی نقصان نہیں پہنچا، پہلے سے گراؤنڈ کیے گئے تین طیاروں اور ایک فیول باؤزر کو بھی کچھ نقصان پہنچا، پاکستان کی مسلح افواج ملک سے دہشت گردی کی لعنت کو ہر قیمت پر ختم کرنے کے لیے پرعزم ہیں۔ جن طیاروں کو نقصان پہنچا وہ پہلے ہی پرانے ہونے کی وجہ سے کام سے باہر تھے۔