وہاب ریاض قومی ٹیم کے عبوری چیف سلیکٹر مقرر
لاہور:(سنونیوز)مشیر کھیل پنجاب وہاب ریاض قومی ٹیم کے عبوری چیف سلیکٹر ہونگے. ذکاء اشرف نے قومی ٹیم کے چیف سلیکٹر کے لئے وہاب ریاض کا نام فائنل کیا۔
ذرائع کے مطابق نگران وزیراعلی پنجاب محسن نقوی کی جانب سے اجازت اور کلیئرنس دئیے جانے کے بعد وہاب ریاض کا نام عبوری چیف سلیکٹر کے طور پر فائنل کیا۔وہاب ریاض کے عبوری چیف سلیکٹر کی تقرری کا اعلان پی سی بی جلد کر دے گاوہاب ریاض عبوری چیف سلیکٹر کی وجہ سے. مشیر کھیل کا عہدہ چھوڑیں گے ی نہیں فیصلہ نہ ہوسکا۔
سابق ٹیسٹ کرکٹر و مشیر کھیل پنجاب وہاب ریاض کی عبوری چیف سلیکٹر کے طور پر پہلی اسائنمنٹ دورہ آسٹریلیا کے لئے اسکواڈ کا انتخاب کرنا ہے۔وہاب ریاض 20 نومبر سے راولپنڈی میں کیمپ کا معائنہ کرینگے۔
عبوری چیف سلیکٹر کے عہدے پر فائز ہونے کے بعد وہاب ریاض کی جانب سے بیان جاری کیا گیا جس میں انہوں نے کہا کہ پاکستان کرکٹ بورڈ کی جانب سے دی جانے والی ذمہ داری کو پوری ذمہ داری سے ادا کرنے کی کوشش کروں گا،میں پاکستان کرکٹ بورڈ کا شکریہ ادا کرتا ہوں کہ انہوں نے مجھ پر یقین کرکے یہ ذمہ داری سونپی۔
Wahab Riaz opens up about his appointment as chief selector and outlines his priorities in this role 🎙️🏏
More details ➡️ https://t.co/3uhDwHUhIB pic.twitter.com/qfuv0Y9Bdm
— Pakistan Cricket (@TheRealPCB) November 17, 2023
مقرر ہونے والے چیف سلیکٹر نے کہا کہ نیوزی لینڈ اور آسٹریلیا کے خلاف ہونے والی سیریز کے لیے متوازی ٹیم تشکیل دینے کی کوشش کریں گے جس کے لیے ڈومیسٹک سیزن کھیلنے والے بہترین کھلاڑیوں کو بھی شامل کرنا پڑ ے گا۔
گذشتہ دنوں پاکستان کرکٹ بورڈ کی جانب سے چیف سلیکٹر کی پیشکش کیے جانے پر نگران مشیر سپورٹس وہاب ریاض نے وزیر اعلی پنجاب سے رابط کیا جس پر وزیر اعلی پنجاب نے وہاب ریاض کو چیف سلیکٹر بنانے کی منظوری اور کلیر نس دے دی ۔ زرائع کے مطابق وہاب ریاض چیف سلیکٹر کا عہدہ سنبھالنے کے بعد صوبائی کابینہ کا بھی حصہ رہیں گے ۔
خیال رہے کہ ورلڈ کپ 2023ء میں ناقص کاکردگی کے بعد کرکٹ بورڈ نے ٹیم اور مینجمنٹ میں اہم تبدیلیاں کر دی ہیں۔ گذشتہ روز بائولنگ کوچ مورنی مورکل نے استعفیٰ دیا اور آج کپتان بابر اعظم نے بھی تمام فارمیٹس کی کپتانی چھوڑنے کا اعلان کردیا۔
بابر اعظم نے اس کا اعلان سماجی رابطوں کی ویب سائٹ ایکس پر کیا۔ انہوں نے کہا کہ میں نے ون ڈے، ٹیسٹ کرکٹ اور ٹی ٹونٹی فارمیٹس کی کپتانی سے دستبردار ہونے کا فیصلہ کر لیا ہے۔
بابر اعظم نے اپنی ٹویٹ میں لکھا کہ کپتانی چھوڑنے کا فیصلہ مشکل لیکن یہی درست وقت ہے، میں بطور کھلاڑی پاکستان کی نمائندگی کرتا رہوں گا۔ پاکستان کرکٹ بورڈ (پی سی بی) نے جو مواقع دیے، میں اس پر مینجمنٹ کا شکر گزار ہوں۔ میری کپتانی میں ٹیم نے ون ڈے کرکٹ میں نمبر ون پوزیشن حاصل کی۔ تاہم ٹیم کو نمبر ون بنانے میں کھلاڑیوں اور کوچز سمیت سب کا کردار رہا۔
خیال رہے کہ اس سے قبل یہ خبریں تھیں کہ بابرا عظم کو دورہ آسٹریلیا میں ٹیسٹ ٹیم کا کپتان برقرار رکھنے کا فیصلہ کر لیا گیا ہے۔ کہا جا رہا تھا کہ اس کا فیصلہ پاکستان کرکٹ بورڈ کی مینجمنٹ کمیٹی کے چیئرمین ذکا اشرف کیساتھ بابر اعظم کی ملاقات میں کیا گیا۔
سنو نیوز ذرائع کے مطابق بابراعظم کی ذکا اشرف سے ملاقات ضرور ہوئی لیکن انہوں نے اپنی ناقص کارکردگی بارے رپورٹ پیش کی ۔ بابر اعظم نے بائولنگ سمیت تمام شعبوں میں ناقص کارکردگی کوذمہ دار ٹھہرایا اور کہا کہ بھارت سے ناکامی کے بعد کھلاڑی مورال ڈائون ہوگیا تھا جبکہ جنوبی افریقا اور افغانستان سے ناکامی سیمی فائنل تک نہ پہنچنے کا سبب بنی۔
یہ بھی پڑھیں:کپتانی چھوڑنے پر سینئر اور ساتھی کرکٹرز کا بابراعظم کے نام پیغام
اس سے قبل پاکستان کرکٹ بورڈ (سنو نیوز) کی جانب سے جاری بیان میں کہا گیا تھا کہ مکی آرتھر سمیت پورے کوچنگ سٹاف کی ذمہ داریاں تبدیل کر دی گئی ہیں۔ تمام کوچز نیشنل کرکٹ اکیڈمی میں کام جاری رکھیں گے جبکہ نیوزی لینڈ اور آسٹریلیا میں ہونے والی سیریز کیلئے مقررہ وقت پر نئے کوچنگ سٹاف کا اعلان کیا جائے گا۔
دوسری جانب پاکستان کرکٹ بورڈ نے شان مسعود کو ٹیسٹ جبکہ شاہین شاہ آفریدی کو ٹی ٹونٹی ٹیم کا کپتان بنانے کا فیصلہ کیا ہے۔ 34 سالہ شان مسعود نے 30 ٹیسٹ میچوں میں پاکستان کی نمائندگی کی ہے۔ انہوں نے چار سنچریوں اور سات نصف سنچریوں کی مدد سے 1597 رنز بنائے ہیں۔
