لاہور: (ویب ڈیسک) پولیس خدمت مراکز پر رش کے باعث ایپ کے ذریعے لرننگ ڈرائیونگ لائسنس بنانے کا فیصلہ کر لیا گیا۔ حکومت پنجاب نے پٹرولنگ پوسٹ، خدمت مراکز کے ساتھ ساتھ پولیس سٹیشنز، آن لائن اور ایپ کے ذریعے شہریوں کو لرننگ ڈرائیونگ لائسنس بنوانے کی سہولت فراہم کرنے کا فیصلہ کیا ہے۔ آئی جی پنجاب ڈاکٹر عثمان انور نے چیئرمین پنجاب انفارمیشن ٹیکنالوجی بورڈ فیصل یوسف کے ہمراہ پولیس خدمت مرکز لبرٹی کا دورہ کیا اور کہا کہ لرنر و ریگولر ڈرائیونگ لائسنس، انٹرنیشنل ڈرائیونگ لائسنس اور رینیول آف لائسنس کا حصول انتہائی آسان بناتے ہوئے نئے آن لائن سسٹم ڈاٹ نیٹ متعارف کروا رہے ہیں۔

حکومت پنجاب نے فیصلہ کیا کہ پٹرولنگ پوسٹ، خدمت مراکز کے ساتھ ساتھ پولیس سٹیشنز، آن لائن اور ایپ کے ذریعے شہریوں کو لرنگ لائسنس بنوانے کی سہولت فراہم کی جائے، اب سے ڈرائیونگ لرنر، ریگولر ڈرائیونگ لائسنس، انٹرنیشنل ڈرائیونگ لائسنس اور رینیول آف لائسنس کا حصول انتہائی آسان بناتے… pic.twitter.com/3PrNuTQjA3

— Punjab Police Official (@OfficialDPRPP) December 9, 2023

ڈاکٹر عثمان انور نے کا کہنا تھا کہ سسٹم کے ذریعے اب شہری گھر بیٹھے آن لائن لرننگ ڈرائیونگ لائسنس کی سہولت سے فائدہ اٹھا سکیں گے، اوور لوڈ کی وجہ سے لائسنس اجراء سسٹم میں تعطل و خرابی کرنے کے خدشات کو دور کر دیا گیا ہے۔ انہوں نے چیئرمین پی آئی ٹی بی فیصل یوسف کے ہمراہ خصوصی پیغام بھی جاری کیا جس میں کہا گیا شہریوں کے لئے آن لائن لرنر آن ویب ایپ سروس آج سے شروع کی جا رہی ہے، پنجاب کے تھانوں کے فرنٹ ڈیسک پر لرنر لائسنس بنانے کی سہولت کا آغاز بھی آج کر دیا جائے گا۔ آئی جی پنجاب نے کہا کہ لبرٹی خدمت مرکز پر آج شام 06 بجے سے 50 سال سے زائد العمر شہریوں کی میڈیکل ویریفیکیشن کی سہولت بھی میسر کر دی جائے گی، پنجاب پولیس خدمت ایپ کے ذریعے شہریوں کو لرنر کی سہولت 11 دسمبر کی شام سے فراہم کر دی جائے گی۔