لاہور(سنو نیوز) ارجنٹائن کے سٹار فٹبالر لیونل میسی سعودی عرب کے الہلال کلب کے ساتھ معاہدے پر رضا مند ہو گئے۔ برطانوی رپورٹ کے مطابق سعودی کلب کی 262 ملین پاؤنڈز سالانہ معاہدے کی پیشکش کو میسی نے قبول کرلیا ہے، اس حوالے سے جلد باضابطہ اعلان بھی متوقع ہے۔ رپورٹس کے مطابق لیونل میسی اس وقت فرانس کے کلب پیرس سینٹ جرمین کے لیے کھیل رہے ہیں، مگر پی ایس جی نے گزشتہ دنوں سعودی عرب میں چھٹیاں منانے پر لیونل میسی کو 2 ہفتوں کے لیے معطل کر دیا تھا۔ خیال رہے کہ 2021 میں لیونل میسی نے پی ایس جی کے ساتھ 2 سال تک کھیلنے کا معاہدہ کیا تھا جو رواں سال ختم ہو جائے گا، تاہم فرانسیسی کلب کی جانب سے معطلی پر خیال ظاہر کیا جا رہا تھا کہ لیونل میسی معاہدے کی تجدید نہیں کریں گے اور کسی دوسرے کلب کے لیے کھیلنے کو ترجیح دیں گے۔ ایسے میں رپورٹس سامنے آئیں کہ سعودی عرب کے فٹبال کلب الہلال نے میسی کو تاریخ کے سب سے زیادہ معاوضے کے معاہدوں میں سے ایک کی پیشکش کی ہے۔