اسلام آباد: (ویب ڈیسک) وفاقی وزارت داخلہ نے امریکاکی درخواست پر تحریک انصاف کی کارکن خدیجہ شاہ کو قونصلر رسائی دینے کی منظوری دے دی ہے۔

تفصیل کے مطابق وفاقی وزارت داخلہ نے نو مئی کے پرتشدد واقعات میں مبینہ طور پر ملوث ہونے کے باعث گرفتار ہونے والی معروف ڈیزائنر خدیجہ شاہ کو امریکی سفارتخانے کی درخواست پرقونصلر رسائی دینے کی منظوری دے دی ہے۔

وزارت خارجہ کے ذریعے وزارت داخلہ کو قونصلر رسائی کی درخواست موصول ہوئی تھی۔ خدیجہ شاہ کے معاملے پر امریکی سفارتخانے نے وزارت داخلہ کو درخواست کی تھی ۔ وزارت داخلہ نے ہوم ڈپارٹمنٹ پنجاب کو امریکی قونصلیٹ لاہور سے خدیجہ شاہ کے معاملے پر تعاون کرنے کی ہدایات جاری کر دی ہے۔

یہ بھی پڑھیں: خدیجہ شاہ سمیت پی ٹی آئی کی دیگر خواتین جوڈیشل ریمانڈ پر جیل منتقل

خیال رہے کہ گذشتہ روزامریکہ نے جناح ہاؤس حملے میں گرفتارپی ٹی آئی کارکن خدیجہ شاہ تک قونصلررسائی مانگ لی تھی۔ امریکی محکمہ خارجہ کے پرنسپل نائب ترجمان ویدانت پٹیل نے پریس بریفنگ کے دوران ایک سوال کے جواب میں کہاکہ ’ہم خدیجہ شاہ کے کیس کی پیروی کر رہے ہیں اور اس حوالے سے ہم نے پاکستانی حکام سے ان کو قونصلر رسائی دینے کے لیے کہا ہے، امریکہ ہمیشہ تمام ممالک پر زور دیتا ہے کہ وہ امریکی شہریوں کو حراست میں لیے جانے پر عمل کے لیے قونصلر نوٹیفیکیشنز پر عمل کریں۔‘

ترجمان ویدانت پٹیل نے کہاکہ ’خدیجہ شاہ امریکہ اور پاکستان کی دہری شہریت رکھتی ہیں اور اس لیے ہم حکومت پاکستان کے ساتھ براہ راست رابطے میں ہیں، جب بھی کسی امریکی شہری کو بیرون ملک گرفتار کیا جاتا ہے تو ہم ہر طرح کی مناسب (قانونی) مدد فراہم کرنے کے لیے تیار رہتے ہیں اور ہم پاکستانی حکام سے توقع کرتے ہیں کہ وہ ان زیر حراست افراد کی تمام منصفانہ ٹرائل کے حق احترام کریں گے۔‘

دوسری جانب دہشت گردی کی ایک عدالت نے ‏خدیجہ شاہ سمیت پی ٹی آئی کی دیگر گرفتار خواتین ملزمان کے جسمانی ریمانڈ پر سماعت کے بعد انھیں جوڈیشل ریمانڈ پر جیل بھیج دیا ہے۔

دوران سماعت سرکاری وکیل نے عدالت کو بتایا کہ ‏خدیجہ شاہ، صنم جاوید سے جسمانی ریمانڈ کے دوران ڈنڈا برآمد کروایا ہے۔

یہ بھی پڑھیں: امریکہ نے جناح ہاؤس حملے میں گرفتارپی ٹی آئی کارکن خدیجہ شاہ تک قونصلررسائی مانگ لی

سابق وزیراعظم اور پی ٹی آئی چیئرمین کی گرفتاری کے نتیجے میں ہونے والے پرتشدد مظاہروں میں ملوث گرفتار کارکنوں کی تعداد کے بارے میں پوچھے گئے سوال کے جواب میں امریکی محکمہ خارجہ کے پرنسپل نائب ترجمان نے کہاکہ ’میرے پاس اس حوالے سے کوئی مخصوص تعداد نہیں ہے، میں اس بارے میں جاننا چاہتا ہوں تاہم ظاہر ہے کہ یہ حالات اور رازداری پر منحصر ہے، لیکن ہم اس کے بارے میں معلومات لے رہے ہیں۔‘

پی ٹی آئی چیئرمین کی جانب سے ان کی حکومت کا تختہ الٹنے میں امریکی سازش کے سوال پر ترجمان نے کہا کہ ’یہ الزامات صریحاً جھوٹے ہیں،میں نے اس بارے میں پہلے بھی بات کی تھی، پاکستانی سیاست میں پاکستانی عوام کا اختیار ہے اور انہیں اپنے آئین اور قوانین کے تحت چلنا ہے، امریکہ پاکستان کے ساتھ دیرینہ تعاون کو قدر کی نگاہ سے دیکھتا ہے اور ہم نے ہمیشہ ایک خوش حال اور جمہوری پاکستان کو امریکی مفادات کے لیے اہم سمجھا ہے اور یہ سوچ بدستور برقرار ہے۔‘