اسلام آباد: (سنو نیوز) اسلام آباد ہائیکورٹ نے سابق وزیراعظم عمران خان کی الیکشن کمیشن نااہلی فیصلے کیخلاف اپیل واپس لینے کی درخواست مسترد کر دی۔ اسلام آباد ہائی کورٹ کے چیف جسٹس عامر فاروق نے درخواست مسترد کرنے کا فیصلہ سنایا۔ یاد رہے کہ الیکشن کمیشن نے 21 اکتوبر 2022 کو بانی چیئرمین پی ٹی آئی عمران خان کو بطور رکن اسمبلی نااہل قرار دینےکا فیصلہ سنایا تھا۔ بانی چیئرمین پی ٹی آئی نے فیصلے کے خلاف 28 اکتوبر 2022 کو ہائیکورٹ سے رجوع کیا تھا۔ عمران خان نے لاہور ہائیکورٹ میں معاملہ زیر التوا ہونے کے باعث اپیل واپس لینےکی درخواست دائر کی تھی۔ بانی چیئرمین پی ٹی آئی نے 18 جنوری 2023 کو اپیل واپس لینے کی درخواست دائر کی تھی، فریقین کے دلائل سننے کے بعد عدالت نے 13 ستمبر 2023 کو فیصلہ محفوظ کیا تھا جو آج سنایا گیا ہے۔ یہ بھی پڑھیں https://sunonews.tv/05/12/2023/pakistan/57844/ واضح رہے گزشتہ روز پاکستان تحریک انصاف (پی ٹی آئی) کے بانی رہنما اکبر شیر بابر نے الیکشن کمیشن آف پاکستان (ای سی پی) میں جماعت کے انٹرا پارٹی انتخابات کے خلاف باضابطہ طور پر درخواست دائر کی۔ الیکشن کمیشن میں اپنی درخواست میں اکبر ایس بابر نے استدعا کی کہ الیکشن کمیشن نئے انٹرا پارٹی الیکشن کرانے کا حکم دے، کمیشن غیر جانبدار تیسرا فریق مقرر کرے جو پی ٹی آئی انٹرا پارٹی الیکشن کی نگرانی کرے۔ درخواست میں مزید استدعا کی گئی کہ شفاف انٹرا پارٹی انتخابات کرانے تک جماعت کو انتخابی نشان ’بلا‘ استعمال کرنے کی اجازت نہ دی جائے۔ درخواست گزار نے دعویٰ کیا کہ پی ٹی آئی الیکشن محض دکھاوا، فریب اور الیکشن کمیشن کو دھوکا دینے کی ناکام کوشش تھی، فراڈ انتخابی عمل نے پی ٹی آئی ارکان کو ووٹ دینے اور انتخاب میں حصہ لینے کے حق سے محروم کر دیا، پی ٹی آئی انٹرا پارٹی انتخابات الیکشن ایکٹ 217 کے سیکشن 208 اور ذیلی شق 2 کی خلاف ورزی ہے۔ اکبر ایس بابر نے درخواست کے ہمراہ وڈیو فوٹیج اور دیگر شواہد بھی الیکشن کمیشن میں جمع کرادیے، تین صفحات پر مشتمل درخواست میں الیکشن ایکٹ 2017 کے سیکشن 208کا حوالہ دیا گیا ہے۔ درخواست میں کہا گیا ہے کہ 30 نومبر 2023 کو پی ٹی آئی کور کمیٹی کی پریس ریلیز میں 2 دسمبر کو انٹرا پارٹی الیکشن کرانے کا اعلان کیا گیا اور نیاز اللہ نیازی کو چیف الیکشن کمشنر مقرر کیاگیا، وفاقی سطح پر کمیشن کے کسی اور عہدیدار کا نام نہیں بتایاگیا اور نہ ہی الیکشن قواعد وضوابط، شیڈول، کاغذات نامزدگی کے وقت اور طریقہ کار کا بتایا گیا۔ درخواست میں مزید بتایا گیا کہ پی ٹی آئی کی جانب سے کاغذات کی وصولی اور مسترد کرنے کی تاریخ، اپیلوں کی سماعت کے بارے میں کچھ نہیں بتایا گیا، 2 دسمبر تک انتخابات کے بارے میں کسی قسم کی معلومات پی ٹی آئی ویب سائٹ پر دستیاب نہیں تھیں۔ اکبر ایس بابر نے درخواست میں کہا کہ میں یکم دسمبر2023 کو 4 بجکر 45 منٹ پر پی ٹی آئی ارکان کے وفد کے ہمراہ مرکزی سیکریٹریٹ گیا، پی ٹی آئی نمائندے نے مطلوبہ معلومات فراہم کرنے سے معذوری ظاہر کی اور یہ واقعہ قومی ٹی وی چینلز پر دکھا گیا۔ انہوں نے بتایا کہ اسی روز الیکڑانک میڈیا پر پی ٹی آئی عہدیداروں کے بلامقابلہ انتخاب کی خبریں نشر ہوئیں، انہوں نے پی ٹی آئی کی ویب سائٹ پر جاری ہونے والی خبر بھی درخواست کے ساتھ منسلک کی۔ درخواست میں کہا گیا کہ الیکشن ایکٹ اس بات کا متقاضی ہے کہ ہر سطح پر عہدیداروں کا پارٹی آئین کے مطابق پانچ سال کے لیے انتخاب ہو، قانون کے مطابق سیاسی جماعت کے ہر رکن کو یکساں انداز میں کسی بھی عہدے پر انتخاب لڑنے کی اجازت ہوگی، قانون کے مطابق تمام سیاسی جماعتوں کا الیکٹورل کالج ہوگا اور انتخابی کالج وفاقی، صوبائی اور مقامی سطح پر پارٹی کی جنرل کونسل پر مشتمل ہوگا۔ اس میں مزید بتایا گیا کہ قانون کے مطابق سیاسی جماعت مرکزی عہدیداروں اور ایگزیکٹو کمیٹی کے ارکان کی تازہ ترین فہرست جاری کرنے کی پابند ہے، اس میں کسی تبدیلی کے بارے میں الیکشن کمیشن کو آگاہ کیا جائے گا۔ درخواست گزار اکبر ایس بابر نے کہا کہ اب بھی پی ٹی آئی کارکن ہوں، اس حوالے سے الیکشن کمیشن اور اسلام آباد ہائی کورٹ فیصلہ دے چکی ہیں، حقیقی جمہوری جماعت بنانے اور نظریاتی رکن کے طور پرپی ٹی آئی کو اپنی زندگی کے بہترین سال دے چکا ہوں۔ ان کا کہنا تھا کہ انصاف کے لیے الیکشن کمیشن سے رجوع کرنے کے سوا کوئی اور چارہ نہیں ہے، سیاسی جماعتیں مستقبل کی سیاسی قیادت کی نرسریاں ہوتی ہیں، الیکشن ایکٹ 2017 اور انتخابی قواعد قانونی فریم ورک کا تقاضا ہے کہ جمہوری انتخابی عمل سے سیاسی جماعتوں میں قیادت منتخب ہو۔ انہوں نے استدعا کی کہ سیاسی جماعتوں میں جعلی انٹراپارٹی الیکشن کے عمل کو ختم کیا جائے، تمام بڑی سیاسی جماعتوں کو انتخابی قوانین اور ضابطوں کا پابند بنایا جائے، معاشرے اور ملک کو درپیش مسائل سے نکلنے کا یہی ایک واحد طریقہ ہے۔