خطیب و امام مسجد الحرام شیخ یاسرالدوسری نے اپنے خطے کے دوران زور دیتے ہوئے کہا کہ مسلمانوں کو چاہیے کہ وہ سوشل میڈیا پر خبریں شیئر کرنے سے قبل ان کی تصدیق کر لیا کریں اور فیک یا خریدے گئے اکاؤنٹس کے مواد سے اجتناب کریں ۔

انہوں نے کہا کہ فیک اکاؤنٹس کے ذریعے جعلی فتوے اور من گھڑت بیانات سوشل میڈیا پر پھیلائے جاتے ہیں تاکہ کسی شخصیت کی ساکھ کو نقصان پہنچایا جا سکے اور معاشرے میں انتشار و تفریق کی فضا پیدا ہو۔

امام کعبہ کا کہنا تھا کہ ہر فرد جو کچھ آن لائن شائع کرتا ہے یا اسے شیئر کرتا ہے وہ اس کے بارے میں اللہ کے سامنے جوابدہ ہے، ٹیکنالوجی کے غلط استعمال کے معاشرے پر خطرناک نتائج سامنے آرہے ہیں۔

شیخ یاسرالدوسری نے کہا کہ سمارٹ فونز کچھ لوگوں کے لیے رابطے کا ذریعہ بننے کے بجائے تنہائی کا سبب بنتے جارہے ہیں، سوشل میڈیا آج جھوٹی زندگیوں اور غیر منصفانہ تقابل کا اسٹیج بن چکا ہے جس سے معاشرے میں حسد، کدورت اور ناشکری کا رجحان بڑھتا چلا جارہا ہے۔

خطیب مسجد الحرام کی جانب سے جعلی اکاؤنٹس کو تنقید کا نشانہ بنایا گیا جو ایک منظم مہم کے تحت علما ء کی طرف جھوٹے فتوے منسوب کرتے ہیں۔