مودی کے اربوں کے دفاعی بجٹ کے باوجود رافیل کی تباہی نے بھارتی دفاعی دعوؤں کا بھانڈا پھوڑ دیا۔

بین الاقوامی جریدے رائٹرز کے مطابق پاکستان نے بھارت کا جدید ترین رافیل طیارہ چینی ٹیکنالوجی سے مار گرایا، پاک فضائیہ نے ایئر چیف ظہیر احمد سدھو کے خصوصی احکامات پر بھارتی رافیل کو نشانہ بنایا، گھنٹہ بھر جاری فضائی لڑائی میں کسی جنگ میں تباہ نہ ہونے والا رافیل مار گرانا تاریخی واقعہ ہے۔

رائٹرز کے مطابق رافیل کی تباہی کی بنیادی وجہ بھارتی انٹیلی جنس کی ناکامی تھی، بھارتی انٹیلی جنس نے میزائل کی رینج کا غلط اندازہ لگایا جس سے رافیل پائلٹس کو غلط فہمی ہوئی، پاکستانی جے 10 سی طیاروں نے چینی PL-15 میزائل سے 200 کلومیٹر سے حملہ کیا۔

رپورٹ میں کہا گیا کہ پاکستان نے الیکٹرانک وارفیئر کے ذریعے بھارتی ریڈار اور مواصلاتی نظام جیم کیے، پاکستان نے چینی سسٹم، سویڈش ریڈار اور پاکستانی ڈیٹا لنک کی مدد سے میدان جنگ میں سبقت حاصل کی، بھارتی فضائی بیڑہ مختلف ممالک کے طیاروں پر مشتمل تھا، بھارت کے پاس مؤثر نیٹ ورک موجود نہیں تھا۔

رائٹرز کے مطابق ابتدائی نقصانات کے بعد بھارت نے حکمت عملی بدلی اور براہموس میزائلوں سے پاکستانی تنصیبات پر حملے کیے، چین کے ایئر چیف نے پاکستان کا دورہ کر کے چینی ٹیکنالوجی کی کامیابی کا جائزہ لیا، پاک بھارت جنگ بندی امریکی سفارتی مداخلت کے بعد ممکن ہوئی۔

رپورٹ میں کہا گیا کہ فرانس کے ایئر چیف کی تصدیق کے باوجود مودی سرکار نے رافیل کے تباہ ہونے کو تسلیم نہ کیا، پہلی بار کسی جنگ میں رافیل کا گرنا مودی سرکار کے لیے رسوائی کا سبب بن گیا، مودی کی ناقص حکمت عملی نے بھارتی افواج کو میدان جنگ میں ذلیل و رسوا کر دیا۔