اسرائیلی وزارت دفاع کے مطابق اسرائیلی وزیر دفاع اسرائیل کاٹس نے رامون ایئربیس کے دورے کے دوران گفتگو کرتے ہوئے کہا کہ میرا ایرانی سپریم لیڈر آیت اللہ خامنہ ای کو واضح پیغام ہے کہ اگر انہوں نے تل ابیب کو دھمکیاں دینا جاری رکھا تو اسرائیل کے لمبے ہاتھ مزید شدت کے ساتھ تہران اور آپ تک پہنچیں گے۔

اسرائیل کاٹس کا دھمکی دیتے ہوئے مزید کہنا تھا کہ اگر ایران اسرائیل کو دھمکانے باز نہ آیا تو اسرائیلی فورسز تہران پر دوبارہ حملہ آور ہوں گی اور اس بار نشانہ خامنہ ای خود ہوں گے۔

واضح رہے کہ اسرائیلی وزیر دفاع کا یہ بیان ایران اور اسرائیل کے درمیان 12 روزہ جنگ ختم ہونے کے ایک ماہ بعد سامنے آیا ہے۔

یہ بھی پڑھیں:ایرانی صدر کا اسرائیل کی جانب سے قتل کی کوشش کیے جانے کا انکشاف

یاد رہے کہ ایران اسرائیل جنگ کے دوران اسرائیلی وزیر دفاع نےکہا تھا کہ ایرانی سپریم لیڈر خامنہ ای کو مزید زندہ نہیں رہنے دینا چاہیے، خامنہ ای نے اسرائیل کی تباہی کو اپنا ہدف مقرر کر رکھا ۔

اسرائیل کاٹس نے مزید کہا تھا کہ ایرانی سپریم لیڈر ذاتی طور پر اسرائیل میں ہسپتالوں پر حملے کے احکامات دیتے ہیں، اس لیے ایسا شخص اب مزید دنیا میں موجود نہیں رہ سکتا۔