اسلام آباد میں پاکستان کرکٹ بورڈ کا اہم اجلاس ہوا جس میں ہیڈ کوچ مائیک ہیسن ، ڈائریکٹر ہائی پرفارمنس عاقب جاوید اور سلیکشن کمیٹی کے ارکان شریک ہوئے۔

اجلاس میں شاہین شاہ آفریدی کو پاکستان ون ڈے ٹیم کا کپتان مقرر کر دیا گیا، شاہین شاہ آفریدی جنوبی افریقہ کے خلاف تین ون ڈے انٹرنیشنل میچز میں قومی ٹیم کی قیادت کریں گے۔

خیال رہے کہ پاکستان اور جنوبی افریقہ کے درمیان ون ڈے سیریز 4 سے 8 نومبر تک فیصل آباد کے اقبال سٹیڈیم میں کھیلی جائے گی۔

یہ بھی پڑھیں: محمد رضوان کی کپتانی خطرے میں پڑ گئی

واضح رہے کہ لیفٹ آرم فاسٹ باؤلر اب تک 66 ون ڈے اور 92 ٹی 20 انٹرنیشنلز میچز میں قومی ٹیم کی نمائندگی کر چکے ہیں، جن میں انہوں نے مجموعی طور پر 249 وکٹیں حاصل کیں، جبکہ 32 ٹیسٹ میچوں میں شاہین نے 120 وکٹیں حاصل کر رکھی ہیں۔

یاد رہے کہ اس سے قبل شاہین آفریدی 2024 میں نیوزی لینڈ کے خلاف ان کے ہوم گراؤنڈ پر پانچ ٹی 20 میچز میں بھی پاکستان ٹیم کی قیادت کر چکے ہیں۔

ذہن نشین رہے کہ محمد رضوان نے آخری مرتبہ اگست 2025 میں ویسٹ انڈیز کے خلاف سیریز میں قومی ٹیم کی قیادت کی تھی، جہاں کیریبین ٹیم نے 1991 کے بعد پہلی بار پاکستان کے خلاف ون ڈے سیریز میں کامیابی حاصل کی۔