پراونشل ڈیزاسٹر مینجمنٹ اتھارٹی (پی ڈی ایم اے) پنجاب کے ترجمان نے کہا ہے کہ محکمہ موسمیات نے پنجاب کے بیشتر اضلاع میں ہلکی بارشوں کی پیشگوئی ہے، 4 سے 5 نومبر کے دوران پنجاب کے بیشتر اضلاع میں بارش کا امکان ہے۔

ترجمان نے بتایا کہ صوبائی دارالحکومت لاہور سمیت راولپنڈی، مری، گلیات، اٹک، تلہ گنگ، جہلم، سرگودھا او ر خوشاب میں بارشیں متوقع ہیں، گوجرانوالہ، سیالکوٹ اور نارووال میں بھی بادل برسنے کا امکان ہے جبکہ مری اور گلیات سمیت دیگر پہاڑی علاقوں میں برف باری کی پیشگوئی ہے۔

ڈائریکٹر جنرل پی ڈی ایم اے پنجاب عرفان علی کاٹھیا نے اس حوالے سے کہا ہے کہ بارشوں کے باعث درجہ حرارت میں واضح طور پر کمی واقع ہو گی، ممکنہ بارشوں سے سموگ میں بھی کمی کے امکانات ہیں۔

یہ بھی پڑھیں: پنجاب میں فضائی آلودگی تشویش ناک صورتحال اختیار کرگئی

انہوں نے کہا کہ شہری سموگ سے بچاؤ کیلئے ماسک کا استعمال کریں اور غیر ضروری طور پر گھروں سے باہر نہ نکلیں، شہری خراب موسم کی صورتحال میں غیر ضروری سفر سے گریز کریں، کسان اپنی سرگرمیوں کو موسم کی صورتحال کے مطابق ترتیب دیں، دوران سفر فوگ لائیٹس کا استعمال کریں۔

ڈی جی پی ڈی ایم اے کا مزید کہناتھا کہ پی ڈی ایم اے کنٹرول روم میں صورتحال کی مانیٹرنگ 24 گھنٹے جاری ہے، شہری کسی بھی ہنگامی صورتحال میں پی ڈی ایم اے کی ہیلپ لائن 1129 پر کال کر سکتے ہیں۔