عموماً ایسا تب ہوتا ہے جب صارف رقم نکالنے کی کوشش کرتا ہے لیکن رقم مشین کے اندر ہی پھنس جاتی ہے یا اکاؤنٹ سے کاٹ لی جاتی ہے مگر رقم ہاتھ نہیں آتی۔ اس صورتحال میں بیشتر لوگ گھبراہٹ کا شکار ہو جاتے ہیں، حالانکہ چند احتیاطی اقدامات سے نقصان سے بچا جا سکتا ہے۔
ماہرین کے مطابق اگر اے ٹی ایم مشین سے رقم نکلنے کے دوران تکنیکی خرابی یا نیٹ ورک فیل ہونے کی وجہ سے کیش مشین میں پھنس جائے تو سب سے پہلے چند منٹ انتظار کریں۔ اکثر اوقات یہ عارضی مسئلہ ہوتا ہے اور سرور درست ہونے کے بعد رقم خود بخود نکل آتی ہے۔ اس مرحلے پر 10 سے 15 منٹ انتظار کرنا مفید رہتا ہے۔
اگر اتنے وقت میں رقم نہیں نکلتی اور اکاؤنٹ سے کٹوتی ظاہر ہو جائے تو فوری طور پر اے ٹی ایم ٹرانزیکشن سلپ کو محفوظ کرلیں، کیونکہ یہ شکایت درج کرانے میں بنیادی ثبوت کا کام دیتی ہے۔ اس کے بعد متعلقہ بینک کے کسٹمر کیئر سینٹر پر رابطہ کریں یا قریبی برانچ جا کر شکایت درج کروائیں۔
بینک انتظامیہ کا کہنا ہے کہ عموماً 24 گھنٹوں کے اندر رقم خود بخود واپس صارف کے اکاؤنٹ میں جمع ہو جاتی ہے۔ تاہم اگر ایسا نہ ہو تو تحریری درخواست کے ذریعے شکایت درج کرائیں۔ بینک اس معاملے کی تکنیکی جانچ پڑتال کے بعد عام طور پر 7 دن کے اندر رقم واپس کر دیتا ہے۔
بینکنگ ماہرین کے مطابق اے ٹی ایم سے رقم نکالتے وقت ہمیشہ مشین کے اردگرد ماحول کا جائزہ لینا چاہیے، مشین کے اسکرین پر غلط ہدایات یا مشکوک علامات دیکھنے پر رقم نکالنے سے گریز کریں، ساتھ ہی کوشش کریں کہ بینک برانچ کے اندر نصب اے ٹی ایم مشین سے لین دین کریں تاکہ کسی بھی مسئلے کی صورت میں فوری مدد حاصل ہو سکے۔
یہ چند آسان اقدامات نہ صرف آپ کو مالی نقصان سے بچا سکتے ہیں بلکہ اے ٹی ایم استعمال کے دوران آپ کے اعتماد کو بھی مزید مضبوط بناتے ہیں۔
