وزیراعلیٰ پنجاب کی خصوصی ہدایت پر صوبے کے تمام اضلاع میں جشنِ آزادی کی تقریبات، سجاوٹ، ریلیوں اور پرچم کشائی کی سرگرمیوں کا باقاعدہ آغاز ہو چکا ہے۔

یکم سے 14 اگست تک مختلف اضلاع میں تقریبات کا شیڈول پہلے ہی مرتب کر لیا گیا ہے۔ 14 اگست کو لاہور کے تاریخی حضوری باغ میں مرکزی تقریب منعقد ہو گی، جہاں وزیراعلیٰ قومی پرچم لہرائیں گی۔

اسی روز ایکسپو سینٹر لاہور میں مریم نواز معرکہ حق پارک کی نقاب کشائی کریں گی۔ اس کے ساتھ ساتھ معرکہ حق میوزیم اور یادگارِ معرکہ حق کا افتتاح بھی کیا جائے گا۔

یہ بھی پڑھیں:40 ریلوے سٹیشنوں پر مفت وائی فائی دینگے، حنیف عباسی

تقریبات میں عوام کے تمام طبقات کی بھرپور شرکت متوقع ہے اور ضلعی انتظامیہ کو ہدایت دی گئی ہے کہ سیکیورٹی سمیت تمام انتظامات مکمل کیے جائیں۔

ادھر ویلفیئر ونگ نے اعلان کیا ہے کہ 14 اگست بروز جمعرات عام تعطیل ہو گی۔ اس سلسلے میں تمام محکموں اور اداروں کو نوٹیفکیشن جاری کر دیا گیا، اس موقع پر سول سیکرٹریٹ سمیت تمام سرکاری دفاتر بند رہیں گے۔