اس پروگرام کا مقصد مستحق خاندانوں کے بچوں کو تعلیم کی جانب راغب کرنا اور ان کی مالی معاونت کرنا ہے۔

بینظیر تعلیمی وظائف میں رجسٹریشن کیلئے بچوں کو ہمراہ لے کر قریبی بینظیر انکم سپورٹ پروگرام (BISP) دفتر جانا ہوگا۔ متعلقہ افسر کو بچوں کا ب فارم اور پہلے سے BISP میں رجسٹرڈ موبائل نمبر فراہم کرنا ہوگا، جس کے بعد افسر رجسٹریشن مکمل کر کے انرولمنٹ سلپ جاری کرے گا۔

یہ سلپ بچوں کے اسکول لے جا کر کلاس ٹیچر اور ہیڈ ٹیچر سے مکمل کروانا ضروری ہے۔ اس میں بچوں کی کلاس، سیکشن، اساتذہ کے نام اور کوائف شامل کرنا لازمی ہوگا۔

مکمل شدہ سلپ دوبارہ BISP دفتر میں جمع کروانے کے بعد تصدیق کا عمل مکمل کیا جائے گا، جس کے بعد وظیفہ جاری کر دیا جائے گا۔

وظیفہ حاصل کرنے کیلئے بچوں کی کم از کم 70 فیصد اسکول حاضری لازمی ہے۔ اگر بچہ اسکول تبدیل کرتا ہے تو اس کی اطلاع بھی BISP دفتر کو دینا ضروری ہے۔

اہلیت کی شرائط کے مطابق بچوں کی والدہ کا بینظیر کفالت پروگرام میں شامل ہونا ضروری ہے، اور نادرا سے جاری شدہ بچوں کا ب فارم فراہم کرنا ہوگا۔

عمر کی حدود بھی طے کی گئی ہیں:

پرائمری کیلئے 4 سے 14 سال

سیکنڈری کیلئے 8 سے 18 سال

ہائر سیکنڈری کیلئے 13 سے 22 سال

وظیفہ کی سہ ماہی شرح درج ذیل ہے:

طالبات: پرائمری 3,000، سیکنڈری 4,000، ہائر سیکنڈری 5,000 روپے

طلباء: پرائمری 2,500، سیکنڈری 3,500، ہائر سیکنڈری 4,500 روپے

اضافی طور پر پرائمری تعلیم مکمل کرنے والی طالبات کو 3,000 روپے کا خصوصی بونس بھی دیا جائے گا۔