انہوں نے کہا کہ 2014 ء سے دھرنوں کی سیاست نے پاکستان کو اربوں ڈالر کا نقصان پہنچایا ہے۔ ان کے مطابق حالیہ دنوں میں ایک صوبے کی جانب سے وفاق پر لشکر کشی کی گئی جو آئینی اور قانونی دائرے سے باہر تھا۔

 

 شہباز شریف نے تنقید کرتے ہوئے کہا کہ ایک طرف ملک ترقی کی طرف گامزن ہے، جبکہ دوسری جانب جنونی جتھے وفاق پر چڑھائی کررہے ہیں۔ انہوں نے کہا کہ پیٹرول بم اور گالم گلوچ ان جتھوں کا وطیرہ بن چکا ہے۔

 

 

شہباز شریف نے 2014 ء کے دھرنوں کا ذکر کرتے ہوئے کہا کہ ڈی چوک پر فسادیوں نے نا صرف ملک کا امن و امان خراب کیا بلکہ وہاں قبریں بھی کھودی گئیں۔ انہوں نے اس بات پر افسوس کا اظہار کیا کہ چینی صدر کو اپنے دورہ پاکستان کو منسوخ کرنا پڑا کیونکہ اس وقت کے احتجاج نے سفارتی سطح پر بھی مسائل پیدا کیے۔ وزیراعظم نے کہا کہ فسادیوں کی بدترین خواہش تھی کہ ملک میں انارکی پھیلے، مگر اسلام آباد پولیس اور رینجرز نے ان کے عزائم کو ناکام بنایا۔

 

 

وزیراعظم نے پولیس کی خدمات کو سراہتے ہوئے کہا کہ پنجاب، سندھ، اور بلوچستان پولیس میں بھی اصلاحات کی جارہی ہیں۔ انہوں نے خیبرپختونخوا کو وفاق کی جانب سے ہر ممکن مدد کی پیشکش کی اور کہا کہ اگر ضرورت پڑی تو وفاق ہر طرح کی معاونت فراہم کرنے کے لیے تیار ہے۔ انہوں نے کہا کہ اگر اسلام آباد پولیس میں افسروں اور جوانوں کی کمی ہے، تو وزیر داخلہ کو میرٹ کی بنیاد پر فی الفور بھرتیاں کرنی چاہئیں۔

 

 

تقریب کے دوران وزیراعظم نے اسلام آباد پولیس کی تنخواہیں پنجاب پولیس کے برابر کرنے کا اعلان کیا۔ مزید برآں، انہوں نے پولیس افسران اور انتظامیہ کے افسران کو ایگزیکٹو الاؤنس دینے کا بھی اعلان کیا۔ شہداء کے حوالے سے بات کرتے ہوئے وزیراعظم نے کہا کہ اسلام آباد پولیس کے شہید ہونے والے 64 افسروں اور جوانوں میں سے 20 کو شہداء پیکج مل چکا ہے، جبکہ باقی 44 شہداء کو بھی جلد پیکج دیا جائے گا۔

 

 

وزیراعظم شہباز شریف نے سیف سٹی پروجیکٹ کو سمارٹ سٹی بنانے کے عزم کا بھی اظہار کیا۔ انہوں نے کہا کہ اس معاملے پر وزیر داخلہ سے بات چیت ہو چکی ہے اور امید ہے کہ یہ منصوبہ جلد عملی شکل اختیار کرے گا۔ مزید برآں، انہوں نے پولیس کو میڈلز دینے کا سلسلہ بحال کرنے کا اعلان کیا اور یقین دلایا کہ تمام زیر التوا کیسز کو جلد حل کیا جائے گا۔

 

 

وزیراعظم نے حالیہ احتجاج کے دوران شہید ہونے والے پولیس سپاہی عبدالحمید شاہ کو خراج عقیدت پیش کیا۔ انہوں نے اسلام آباد پولیس کے افسران اور جوانوں کی بہادری کی تعریف کی اور کہا کہ ان کی خدمات قابل ستائش ہیں۔