تفصیلات کے مطابق، سید صدر الدین شاہ راشدی گزشتہ کئی ماہ سے مختلف بیماریوں میں مبتلا تھے اور خاص طور پر وہ گردوں کے عارضے کا شکار تھے۔ ان کی حالت بگڑنے پر انہیں گمس اسپتال گمبٹ منتقل کیا گیا تھا جہاں وہ گزشتہ چند دنوں سے زیرِ علاج تھے۔ ڈاکٹرز کی کوششوں کے باوجود وہ جانبر نہ ہو سکے اور اپنے خالقِ حقیقی سے جا ملے۔
مرحوم کی نماز جنازہ نوڈیرو میں ادا کی گئی، جس میں سیاسی، سماجی اور صحافتی حلقوں کے افراد، فنکار برادری، مقامی عوام اور ان کے چاہنے والوں کی بڑی تعداد نے شرکت کی۔ بعد ازاں سید صدر الدین شاہ راشدی کو ان کے آبائی محلہ پیر گوٹھ کے قبرستان میں سپردِ خاک کر دیا گیا۔
سید صدر الدین شاہ راشدی کو پاکستان بھر میں ان کی صوفی گائیکی، عقیدت بھرا کلام، اور روحانی انداز کے باعث خصوصی مقام حاصل تھا۔ ان کی آواز میں روحانیت کا رنگ ہوتا تھا جو سننے والوں کے دلوں کو چھو لیتا تھا۔ انہوں نے درباروں، محفلِ سماع اور روحانی تقاریب میں اپنی گائیکی کے ذریعے لوگوں کے دل جیتے اور عشقِ الٰہی کے پیغام کو عام کیا۔
فنِ صوفیانہ گائیکی میں ان کی خدمات ناقابلِ فراموش ہیں۔ ان کے کئی کلام آج بھی محافلِ سماع کا حصہ ہیں اور ان کے انتقال کو صوفی موسیقی کی دنیا میں ایک بڑا نقصان قرار دیا جا رہا ہے۔ اہلِ علاقہ اور ان کے مداحوں نے انہیں خراجِ عقیدت پیش کرتے ہوئے کہا کہ وہ ایک سادہ دل، عاجز اور روحانی انسان تھے جنہوں نے اپنی پوری زندگی تصوف اور خدمتِ خلق کے جذبے کے ساتھ گزاری۔ ان کی وفات سے ایک ایسا خلا پیدا ہوا ہے جو مدتوں پُر نہ ہو سکے گا۔
