چیف جسٹس یحیحی آفریدی کی سربراہی میں تین رکنی بنچ نے 9 مئی ملزمان کی ضمانت منسوخی کی اپیلوں پر سماعت کی۔ پنجاب حکومت نے سینئر وکیل ذوالفقار نقوی کی خدمات حاصل کر لیں۔ وکیل ذوالفقار نقوی نے موقف اپنایا کہ پنجاب حکومت نے مجھے 9 مئی مقدمات میں وکیل مقرر کیا ہے، عدالت سے استدعا ہے کہ تیاری کیلئے وقت دیا جائے۔
چیف جسٹس یحیحی آفریدی نے ریمارکس دیئے کہ 9 مئی کے مقدمات تو کل اور پرسوں بھی مقرر ہیں، گزشتہ سماعتوں پر ایڈیشنل پراسیکیوٹر پیش ہو کر وقت مانگتے رہے، آج آپ وقت مانگ رہے ہیں، ایسے نہیں چلے گا، یہ کوئی ایک کیس نہیں پچاس کے قریب اپیلیں ہیں۔
وکیل ذوالفقار نقوی نے عدالت کو بتایا کہ رواں ہفتے کے مقدمات ملتوی کر دیں آئندہ ہفتے والوں کی تیاری کر کے آؤں گا۔ چیف جسٹس یحیحی آفریدی نے کہا کہ کچھ اپیلیں کیس منتقلی کے حوالے سے بھی ہیں، کیس منتقلی کا معاملہ ختم ہوچکا اس پر حکومت سے ہدایات لے لیں۔ وکیل ذوالفقار نقوی نے کہا کہ جج کا تبادلہ ہوچکا صرف جرمانے اور کچھ آبزرویشنز کی حد تک اپیل کی پیروی کریں گے۔
سپریم کورٹ نے 9 مئی اور 10 مئی کے رواں اور آئندہ ہفتے مقرر تمام مقدمات ڈی لسٹ کر دیئے۔ عدالت نے کہا کہ پنجاب حکومت کی مہلت کی استدعا منظور کی جاتی ہے، تمام مقدمات کی سماعت عید کے بعد ہوگی۔
واضح رہے لاہور ہائی کورٹ نے نو مئی کے ملزمان کی ضمانتیں منظور کی تھیں۔ پنجاب حکومت نے ضمانتیں منسوخ کرنے کیلئے سپریم کورٹ سے رجوع کر رکھا ہے۔
