اس منظوری کے تحت تاحیات میعاد کے ساتھ منفرد قومی شناختی کارڈ کا اجرا کیا جا سکے گا۔

تفصیلات کے مطابق نادرا آرڈیننس 2000 کے سیکشن 44 کے تحت نیشنل ڈیٹا بیس اینڈ رجسٹریشن اتھارٹی (نادرا) رولز 2002 میں اہم ترامیم کی منظوری دے دی گئی ہے۔

پریس ریلیز میں بتایا گیا کہ یہ تبدیلیاں اس نظام کو مزید جامع بنانے، دستاویزات کے طریقہ کار کو آسان بنانے اور لوگوں کے مخصوص گروپوں کی مخصوص ضروریات کو پورا کرنے کیلئے ڈیزائن کی گئی ہیں۔

واضح رہے کہ ان میں سے ایک اہم اپ ڈیٹ یہ ہے کہ خصوصی افراد کیلئے تاحیات میعاد کے ساتھ منفرد شناختی کارڈ کا اجرا ممکن ہو سکے گا۔

مزید برآں رہائشی اور غیر رہائشی بالغ شہری جنہیں وفاقی یا صوبائی حکام نے "خصوصی افراد" کے طور پر تسلیم کیا ہوا ہے،وہ وہیل چیئر لوگو والے قومی شناختی کارڈز (NICs) کے بھی اہل ہوں گے۔نادرا ان خصوصی این آئی سی کے اجراء کا انتظام کرے گا۔

علاوہ ازیں معذور بچوں کیلئے، نادرا چائلڈ رجسٹریشن سرٹیفکیٹ یا جووینائل کارڈ کا اجرا بھی کیا جائے گا، جس میں وہیل چیئر کا نشان بھی ہوگا اور وہ قواعد کے مطابق مقرر کردہ مدت کیلئے درست ہوگا۔ 

اس کے ساتھ ساتھ اعضا عطیہ کرنے والے افراد کو بھی تاحیات میعاد کا خصوصی کارڈ جاری کیا جائے گا۔ جس میں وہیل چیئر اور عطیہ دہندگان دونوں کی علامتیں واضح ہوں گی۔

خیال رہے کہ یہ تبدیلیاں پاکستان بھر میں معذور افراد اور اعضاء کے عطیہ دہندگان کیلئے شمولیت کو یقینی بنانے اور ان کی شناخت کو بہتر کرنے کیلئے حکومت کی کوششوں میں ایک اہم قدم کی نشاندہی کرتی ہیں۔

ان کارڈز کیلئے تاحیات درستگی کی پیشکش کرکے، حکومت لوگوں کیلئے خدمات تک رسائی کو آسان بنا رہی ہے اور معاشرے میں ان کی منفرد شراکت کیلئے پہچانی جاتی ہے۔