پرتشدد ہجوم کا سیکیورٹی فورسز پر حملہ، ایک جوان شہید، 16 زخمی
July, 29 2024
گوادر:(سنو نیوز)بلوچستان کے ضلع گوادر میں سیکیورٹی فورسز کے اہلکاروں پر ایک پُرتشدد ہجوم نے حملہ کیا، جس کے نتیجے میں ایک سپاہی شہید اور ایک افسر سمیت 16 جوان زخمی ہوگئے۔
پاک فوج کے شعبہ تعلقات عامہ (آئی ایس پی آر) نے بیان جاری کیا ہے کہ یہ حملہ ایک نام نہاد تنظیم کے تحت کیا گیا تھا۔
حملے میں سپاہی شبیر بلوچ نے شہادت پائی جبکہ دیگر زخمی اہلکاروں میں ایک افسر بھی شامل ہے۔
آئی ایس پی آر نے کہا کہ سیکیورٹی فورسز نے انتہائی صبر و تحمل کا مظاہرہ کیا اور مزید نقصان سے بچنے کی کوشش کی۔
پاک فوج کے ترجمان نے کہا کہ ہجوم کی پرتشدد کارروائیاں ناقابل قبول ہیں اور اس واقعے کے ذمہ داروں کو انصاف کے کٹہرے میں لایا جائے گا۔
ترجمان نے عوام سے اپیل کی کہ وہ کسی بھی قسم کے پروپیگنڈے کا شکار نہ ہوں اور بلوچستان کے امن و امان کو برقرار رکھنے کے لیے سیکیورٹی فورسز کے ساتھ تعاون کریں۔
وزیر اعلیٰ بلوچستان سرفراز بگٹی نے اس واقعے پر رد عمل دیتے ہوئے کہا کہ گوادر میں فرنٹیئر کور کے 16 جوان زخمی ہوئے ہیں، جن میں سے ایک کی آنکھ ضائع ہو چکی ہے۔
انہوں نے سوال اٹھایا کہ اگر یہ لوگ پرامن تھے تو کیسے ایف سی پر فائرنگ کر سکتے ہیں؟
انہوں نے بلوچستان اسمبلی میں خطاب کرتے ہوئے کہا کہ کیا ایسے جتھوں کو اجازت دی جائے کہ وہ حکومت کے معاملات میں مداخلت کریں؟
انہوں نے مزید کہا کہ حکومت بلوچستان کے امن کو سبوتاژ کرنے کی کسی بھی کوشش کو ناکام بنانے کے لیے پرعزم ہے اور عوام کو بھی اس حوالے سے تعاون کرنا چاہیے۔
ضرور پڑھیں
