اسلام آباد ہائیکورٹ کی جانب سے جاری کردہ اس فیصلے کے بعد انہیں 10 جنوری سے 24 جنوری تک بیرون ملک سفر کی اجازت مل گئی ہے۔
عدالتی فیصلے میں جسٹس محسن اختر کیانی نے سیکرٹری داخلہ کو ہدایت کی کہ وہ یہ یقینی بنائیں کہ لطیف کھوسہ کو بیرون ملک جانے سے نہ روکا جائے۔
عدالت نے فیصلہ جاری کرنے کے بعد سیکرٹری داخلہ، نیب، ایف آئی اے، پولیس اور امیگریشن اتھارٹیز کو اس فیصلے سے آگاہ کرنے کا حکم بھی دیا۔
واضح رہے کہ لطیف کھوسہ نے عدالت میں پیش کی جانے والی درخواست موقف اختیار کیا تھا کہ وہ کینیڈا جانا چاہتے ہیں، جس کیلئے انہوں نے 10 جنوری سے 24 جنوری تک کا ٹکٹ بھی پیش کیا تھا۔ عدالت نے ان کے نام کو پاسپورٹ کنٹرول لسٹ میں شامل کرنے کے 26 دسمبر کے نوٹیفکیشن کو آئندہ سماعت تک معطل کر دیا۔
عدالت نے اس کے ساتھ ساتھ لطیف کھوسہ کو ہائیکورٹ اور انسداد دہشت گردی عدالت میں شورٹی جمع کرانے کا حکم بھی دیا ہے۔ کیس کی مزید سماعت 6 فروری تک ملتوی کر دی گئی ہے۔
